[A:༣༨༤] དོན་དེས་རྗེ་བླ་མར་ངག་དབང་ཀུན་དགའ་ལེགས་པའི་འབྱུང་གནས་ཡེ་ཤེས་རྒྱལ་མཚན་དཔལ་བཟང་པོ་ཞེས་པའི་མཚན་གྱི་བསྔགས་པ་ཕུལ་བ་ཡིན་གསུངས་པའི་ཕྱིར། དེ་ལྟ་བུའི་སློབ་མའི་ཚོགས་ཐམས་ཅད་ཀྱིས་བླ་མའི་རྣམ་ཐར་ལ་སློབ་པའི་ཚུལ་གྱིས་བཤད་སྒྲུབ་གཉིས་ཀྱི་སྒོ་ནས་ཕན་བདེའི་འབྱུང་གནས་རྒྱལ་བསྟན་རིན་པོ་ཆེ་ཡུན་དུ་སྐྱོང་བར་བྱེད་པ་ནི་ངོ་མཚར་རྨད་དུ་བྱུང་བའི་གནས་སུ་གྱུར་པ་ལགས་སོ།། །།སླར་ཡང་སྨྲས་པ། སྲིད་ལ་མ་ཞེན་ངེས་འབྱུང་ཚུལ་ཁྲིམས་དག །ཞི་ལ་མ་ཆགས་གཞན་ཕན་སེམས་མཆོག་འབྱོངས། །གཉིས་སུ་མ་ཞེན་འཁོར་འདས་དབྱེར་མེད་རྟོགས། །སུམ་ལྡན་རྡོ་རྗེ་འཛིན་པ་ལ་ཕྱག་འཚལ། །རྣམ་མང་ཐོས་པས་ཕྱི་ཡི་སྒྲོ་འདོགས་བཅད། །དེ་དོན་བསམ་པས་གཞུང་ལུགས་གདམས་པ་ཤར། །ཡེངས་མེད་བསྒོམས་པས་ནང་གི་རྟེན་འབྲེལ་གྲུབ། །སྡེ་སྣོད་འཛིན་པའི་གཙུག་རྒྱན་ལ་ཕྱག་འཚལ། །དཀའ་བ་དང་བླངས་སྒྲུབ་པའི་རྒྱལ་མཚན་བཙུགས། །ཟབ་དོན་ལེགས་བསྒོམས་རྟོགས་པའི་དྲོད་ཚད་བརྙེས། །སྒྲུབ་འབྲས་མངོན་གྱུར་བསྟན་འགྲོའི་དོན་ཆེན་མཛད། །མཚུངས་མེད་བླ་མའི་ཞབས་ལ་ཕྱག་འཚལ་ལོ། །ཐེག་གསུམ་ལམ་གྱི་ཡོན་ཏན་ཡོངས་སུ་རྫོགས། །སྡོམ་གསུམ་བཀའ་དྲིན་སྩོལ་བའི་དྲིན་ཅན་རྗེ། །སྐྱབས་གསུམ་ཀུན་འདུས་རྩ་བའི་བླ་མ་ལ། །སྒོ་གསུམ་གུས་པས་ཀུན་ཏུ་ཕྱག་འཚལ་ལོ། །མཚུངས་པ་མེད་པའི་དཔལ་མགོན་བླ་མ་ལ། །ཁ་ཞེ་མེད་པའི་དད་པའི་གདུང་ཤུགས་ཀྱིས། །ཉིན་མཚན་མེད་པར་གསོལ་བ་འདེབས་ལགས་ན། །རྒྱུན་ཆད་མེད་པར་བྱིན་གྱིས་བརླབ་ཏུ་གསོལ། །ལུས་དང་ལོངས་སྤྱོད་དུས་གསུམ་དགེ་ཚོགས་བཅས། །ཀུན་བཟང་མཆོད་