[A:384] don des rje bla mar ngag dbang kun dga' legs pa'i 'byung gnas ye shes rgyal mtshan dpal bzang po zhes pa'i mtshan gyi bsngags pa phul ba yin gsungs pa'i phyir/ de lta bu'i slob ma'i tshogs thams cad kyis bla ma'i rnam thar la slob pa'i tshul gyis bshad sgrub gnyis kyi sgo nas phan bde'i 'byung gnas rgyal bstan rin po che yun du skyong bar byed pa ni ngo mtshar rmad du byung ba'i gnas su gyur pa lags so// //slar yang smras pa/ srid la ma zhen nges 'byung tshul khrims dag /zhi la ma chags gzhan phan sems mchog 'byongs/ /gnyis su ma zhen 'khor 'das dbyer med rtogs/ /sum ldan rdo rje 'dzin pa la phyag 'tshal/ /rnam mang thos pas phyi yi sgro 'dogs bcad/ /de don bsam pas gzhung lugs gdams pa shar/ /yengs med bsgoms pas nang gi rten 'brel grub/ /sde snod 'dzin pa'i gtsug rgyan la phyag 'tshal/ /dka' ba dang blangs sgrub pa'i rgyal mtshan btsugs/ /zab don legs bsgoms rtogs pa'i drod tshad brnyes/ /sgrub 'bras mngon gyur bstan 'gro'i don chen mdzad/ /mtshungs med bla ma'i zhabs la phyag 'tshal lo/ /theg gsum lam gyi yon tan yongs su rdzogs/ /sdom gsum bka' drin stsol ba'i drin can rje/ /skyabs gsum kun 'dus rtsa ba'i bla ma la/ /sgo gsum gus pas kun tu phyag 'tshal lo/ /mtshungs pa med pa'i dpal mgon bla ma la/ /kha zhe med pa'i dad pa'i gdung shugs kyis/ /nyin mtshan med par gsol ba 'debs lags na/ /rgyun chad med par byin gyis brlab tu gsol/ /lus dang longs spyod dus gsum dge tshogs bcas/ /kun bzang mchod