[A:383]thub bstan chos kyi rgyal mtshan gtso bor smos shing / bdag cag gis mthar brten pa'i dbus gtsang khams gsum du dpal sa skya pa'i chos brgyud 'dzin pa grangs med pa byung zhing / de dag gi nang na sde snod 'dzin pa dang / sgrub pa la gzhol ba sogs bshad sgrub kyi bstan pa la phan thogs pa mang du byon mod/ de dag thams cad kyi rnam thar lta zhog mtshan gyi rnam grangs tsam yang brjod par mi nus la/ 'on kyang zhal slob thams cad kyi gtso bo ni mchog sprul rin po che 'jam dbyangs chos kyi blo gros zhes gsol ba 'di nyid yin te/ rje nyid kyi zhal nas/ rdzong gsar mkhyen brtse 'di pa nged kyi bla ma'ang yin/ khong gi sku brnyan zhig bris nas bla brgyud kyi gral du'ang bzhugs yod/ slob ma'i gtso bo'ang yin pas khong gi zhabs brtan nged kyis kyang dus rgyun du sgrub kyin yod la/ khyed tshos kyang / dus gsum rgyal ba kun gyi gdung 'dzin cing / /theg gsum chos kyi dga' ston 'gyed mkhas pa/ /khams gsum 'gro ba'i 'dren pa gcig gyur pa/ /'jam dbyangs chos kyi blo gros zhabs brtan gsol/ /zhes pa 'di tshogs 'don gyis zhes yang yang gsungs// ! mchog gi sprul skus kyang dad mos drag po rgyun chags su mdzad cing / sngar lam 'bras gsan pa'i skabs rje bla ma sgo rum pa kun dga' legs pa'i 'byung gnas kyi rnam 'phrul yin par thugs ngor gsal ba/ rje bla mas sgo rum pa'i rnam thar gsungs skabs de 'dra'i rnam par thar pa bsam gyis mi khyab pa byis blos bsam par dka' ba zhes spyan hur gyis cer nas gsungs pas rang gi dran rgyu'i lkog gyur mkhyen snyam pa byung /