[A:༧]ཡུལ་དུ་བཙུན་པ་བྱུང་བ་ལ་སྔ་བ་མཁན་པོ་བོ་དྷི་སཏྭ་སྐུ་གཤེགས་ནས་འདིས་མཁན་པོ་བྱས་པ་ཡིན་ནོ། །བྷ་ཛྙཱ་ནེནྡྲ་རཀྵི་ཏ་ཡེ་ཤེས་དབང་པོ་སྲུང་བ་སྟེ། དམ་པའི་ཆོས་འབྱིན་པའི་མཁན་པོ་ཆེན་པོ་བོད་ལ་སྐུ་དྲིན་ཆེ་བ་ཡིན་ཞིང༌། སངས་རྒྱས་ཀྱིས་ཀྱང་བྱང་ཆུབ་སེམས་དཔའ་རྟ་སྐད་ཅེས་བྱ་བར་ལུང་བསྟན་པ་ཐོབ་པ་ཡིན་ནོ། །རཏྣ་ཨིནྡྲ་རཀྵི་ཏ་རིན་ཆེན་དབང་པོ་སྲུང་བ་སྟེ་གསུམ་མོ། །བར་པ་ནི་གླང་སུ་ག་ཏ་ཝརྨ་རཀྵི་ཏ་བདེ་བར་གཤེགས་པའི་གོ་ཆ་སྲུང་བ་ཞེས་བྱའོ། །གཞོན་གསུམ་ནི། པ་གོར་བཻ་རོ་ཙ་ན་རཀྵི་ཏ་རྣམ་པར་སྣང་མཛད་སྲུང་བ་ཞེས་བྱ་བ་དང༌། འཁོན་ནཱ་གེནྡྲ་རཀྵི་ཏ་ཀླུའི་དབང་པོ་སྲུང་བ་ཞེས་བྱ་བ་དང༌། གཙང་དེ་ཝེནྡྲ་རཀྵི་ཏ་ལྷའི་དབང་པོ་སྲུང་བ་ཞེས་བྱ་བ་དང་གསུམ་མོ། །སད་མི་མི་བདུན་ལ། སྐ་བ་ཤྲཱི་ཀུ་ཌི་རཀྵི་ཏ་དཔལ་བརྩེགས་སྲུང་བ་ལ་སོགས་པ་ལོ་ཙཱ་བ་ཆེན་པོ་བརྒྱ་རྩ་བརྒྱད་ཀྱིས་བློ་སྦྱངས་མཛད་ལ། དེ་དག་ལས་ཅོག་རོ་ཀླུའི་རྒྱལ་མཚན་ལ་སོགས་པ་ལོ་ཙཱ་བ་སྟོང་རྩ་བརྒྱད་ཀྱིས་བློ་སྦྱོང་མཛད་དོ། །ཞེས་སྔོན་གྱི་བཀའ་ཆེམས་ཀྱི་ཡི་གེ་རྙིང་པ་ལས་འབྱུང་ངོ༌། །དེ་རྣམས་ཀྱིས་སྒྲ་བསྒྱུར་དང༌། ཞུ་ཆེན་དང༌། མཆན་བུའི་ལོ་ཙཱ་བ་བྱས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་མདོ་སྡེ་མང་པོ་དང༌། རྣམ་སྣང་མངོན་བྱང་ལ་སོགས་པ་བྱ་སྤྱོད་ཀྱི་རྒྱུད་དང༌། དེ་ཉིད་འདུས་པ་ལ་སོགས་པ་རྣལ་འབྱོར་གྱི་རྒྱུད་ལ་སོགས་པ་སྔགས་ཇི་རིགས་པ་དང་སྒྲུབ་ཐབས་མང་དུ་བསྒྱུར། དེ་ནས་བཟུང་སྟེ་དམ་པའི་ཆོས་དར་ཞིང་རྒྱས་པར་མཛད་དོ། །ཁྲི་སྲོང་ལྡེའུ་བཙན་ལ་སྲས་བཞི་བྱུང་བའི་ཆེ་བ་གསུམ་གྲོངས། ཆུང་ཤོས་ཁྲི་ལྡེ་སྲོང་བཙན་སད་ན་ལེགས་མཇང་ཡོན་དུ་གྲགས་པ་དེས་སྐར་ཆུང་གི་ལྷ་ཁང་བཞེངས། པཎྜི་ཏ་བི་མ་ལ་མི་ཏྲ། ཀཱ་མ་ལ་ཤཱི་ལ། ཛྙཱ་ན་སེ་ན། བལ་པོ་ཧཱུྃ་ཀ་ར་རྣམས་བསྟེན་ཏེ།