[A:37]'chang ngag gi dbang po kun dga' rin chen/ sangs rin dbon po/ 'jam dbyangs kun dga' bsod nams lhun grub/ khri chen bsod nams dbang po sogs las dam pa'i chos gsan tshul bsam gyis mi khyab mod kyang / rgyas par gsan yig las shes par bya'o/ /dgung lo nyer dgu pa shing pho spre'u lo rje dkon mchog dpal ldan pa'i bka' bkod la khams phyogs su dus ja'i dge bskul la 'byon dgos zhes phebs/ brtag pa zhus nas chud na dang len zhu/ ma chud na dgongs khrel mi gnang dgos pa'i zhu ba phul/ de rjes brtag pa chud nas khams la 'byon khar/ khyed rang bsnyen rdzogs kyi mkhan po la sdom pa gsum gyi bka' drin thob dgos pas/ stag mo gling khar byon la/ 'jam dbyangs dpon chen pa'i drung du sems bskyed sogs 'dod chos 'dra zhus/ nged kyang mjal 'dod pa tsam 'dug pas thugs 'brel dang bstun nas thub bstan yangs pa can du phebs dgos pa'i snyan zhus kyang phul gsungs pa bzhin hor zla gsum pa'i tshes bco lnga la byon te/ gling kha'i dge 'dun rnams kyi ser phreng gis bsus/ mus chen gyi phyag len sogs bkur sti rgya chen po mdzad/ dbu ma lugs kyi sems bskyed sogs ji ltar bzhed pa'i chos rnams gsan/ hor zla bzhi pa'i tshes bcu la e waM du phebs/ sgrub mchod grol nas khams la 'byon khar rje dkon mchog dpal ldan gyis gsang ba'i mgon khang du khrid de bka' bsgo dang snyan dar gyis phyag mdud cig gnang / gtor bsngos dang phrin las bcol/ bzhugs gdan spor ba sogs mdzad de rten 'brel bsgrigs/ khams su lam 'bras ma bshad/ lo lnga nas sleb par gyis/ de bar gzhi byes gang du'ang bar chad mi 'ong / de las 'gyang na rang gzhan thams cad 'gyang chas su 'gro nyen yod ces sogs kyi bslab don mthil byon