tshogs kyis mdzad pa gdan rabs nor phreng du grags pa de'i kha skong 'jam mgon sangs rgyas phun tshogs nas/ gdan rabs so gsum pa byams pa dpal ldan chos skyong bar gyi rnam thar dpal chos kyis mdzad pa rtogs brjod 'dod rgu'i dpal ster dang / gdan rabs so lnga pa khang sar mkhan chen bsod nams lhun grub kyi rnam thar dpal chos pas mdzad pa/ gdan rabs so drug pa shar chen mi 'gyur rgyal mtshan gyi rnam thar rje rang nyid kyis mdzad pa/ gdan rabs so brgyad pa 'jam dbyangs dkon mchog grags pa'i rnam thar rje rang nyid kyis mdzad pa bcas spar du bzhugs pa'i zhal skong 'bri ba la/ phyag chen thig le las/ gang zhig dbang bskur sbyin byed pa/ /de ni rdor sems lta bur blta/ /bla ma ston pa bas lhag blta/ /yid bzhin rin chen mnyam par blta/ /zhes dang / gur las/ dbang bskur thob pa'i slob dpon la ji ltar blta bar bgyi/ bka' stsal pa/ slob dpon ston par gyur pa ni/ /sangs rgyas kun gyis phyag mdzad pa/ /bdag cag rnams kyi pha dang ma/ /'di nyid yin par bsam par bya/ /zhes dang / sa paN gyis/ bla ma sangs rgyas nyid yin zhes/ /bya ba dbang bskur thob nas yin/ /zhes gsungs pa ltar dbang bskur gtso bor gyur pa'i sdom pa gsum gyi chos kyi bka' drin thob pa'i rtsa ba dang brgyud pa'i bla ma rnams kyi rnam thar brjod pa ni/ dus gsum gyi rgyal ba sras dang bcas pa'i yon tan brjod pa las lhag pa'i bsod nams thob pa sogs don che ba yang dag pa'i lung tshad mas grub pa'i phyir snying po'i don mdor bsdus te brjod pa la//
! gdan rabs so bzhi pa mkhas grub sangs rgyas dpal bzang ni/ mdo khams go 'jo'i yul du bkra shis pa'i dge mtshan du ma dang bcas te sku 'khrungs/ sku chung ngu'i dus nas dam pa'i rigs sad cing / chos spyod dang thos bsam la brtson/ nar son pa na e wa~M chos ldan gyi grwa sar ga zi khang tshan du zhugs/ byams pa bsod nams bzang po/ mkhan chen bkra shis lhun grub/ byams pa tshul khrims lhun grub/ thar rtse nam mkha' bsam 'grub/ mkhan chen dpal ldan chos skyong rnams gtso bor bsten nas/ sdom pa gsum gyi gtsos zab rgyas kyi gdams pa rgya mtsho lta bur gsan/ ma hA paNDi ta tshul khrims rin chen sogs las sgra snyan sogs rig gnas du mar bslab sbyangs mdzad/ dges pa rdo rje sogs lhag pa'i lha'i bsnyen sgrub mthar phyin/ byams pa bsod nams bzang pos mkhan sa'i las khur snga phyi gnyis mdzad pa'i phyi ma'i gdan tshab tu kun mkhyen e wa~M pa'i chos kyi khri la mnga' gsol/ sdom pa gsum dang gsung ngag rin po che sogs zab rgyas chos kyi 'khor lo bskor nas mkhan chen bsod nams lhun grub/ shar chen mi 'gyur rgyal mtshan/ 'jam mgon sangs rgyas ye shes/ smra ba'i seng ge tshul khrims rin chen sogs skal ldan gyi slob tshogs mtha' yas pa bskrun/ mkhan po'i las khur khang sar mkhan chen bsod nams lhun grub la phul nas/ khams sde dge'i phyogs su pheb/ chos kyi rgyal po bstan pa tshe ring dang mchod yon du 'brel/ khro khog tu 'khor mdo dgon dang / rdzong chen dgon gnyis gsar bzhengs kyi bdag rkyen mdzad pa sogs rnam dkar gyi mdzad phrin ches che bar mnga' ba'i bstan 'dzin gyi skyes bu dam pa zhig go/
! gdan rabs so bdun pa 'jam mgon sangs rgyas ye shes ni/ mkhan chen thams