cad mkhyen pa bkra shis lhun grub kyi dbon rigs su/ rang zhabs mdo mkhar zhes par sku 'khrungs/ chung ngu nas ngor gyi chos grwar byon/ chos spyod 'don chog skor dang / rgyud chung bzhi sogs thugs 'dzin mdzad/ byams pa bsod nams bzang po/ mkhan chen bkra shis lhun grub/ 'jam mgon tshul khrims lhun grub/ thar rtse nam mkha' bsam 'grub/ mkhan chen dpal ldan chos skyong sogs dam pa mang po las sdom pa gsum dang / gsung ngag rin po che sogs chos tshul mtha' yas pa gsan/ gzhung lugs rab 'byams la bslab sbyangs dang gzigs rtog mdzad/ kye rdo rje'i gzhi bsnyen sogs lhag pa'i lha du ma'i bsnyen sgrub mthar phyin/ shar chen byang chub sems dpa' rin chen mi 'gyur rgyal mtshan gyi gdan tshab tu dpal kun dga' bzang po'i chos kyi khri la mnga' gsol/ sdom pa gsum dang ngor lugs dkyil 'khor bdun/ gsung ngag rin po che/ sgrub thabs brgya rtsa dang rgya mtsho/ bla ma gong ma'i pod lung sogs dam ba'i chos kyi char sil mar phab pas skal bzang gi shes rgyud 'dzin ma'i dkyil 'khor la mngon mtho dang nges legs kyi 'bras bzang smin pa'i slob tshogs kyang / ngag dbang chos skyong bzang po/ mkhas grub sangs rgyas grags pa/ dpal sa skya pa chen po sngags 'chang bla ma thams cad mkhyen pa ngag dbang kun dga' blo gros/ ma hA paNDi ta tshul khrims rin chen sogs du mar bskrun/ lhar bcas 'gro ba'i skyabs gnas dam par gyur kyang sku tshe ring bor ma bzhugs pa zhi ba'i dbyings su gshegs so/ /
!gdan rabs so dgu pa ngag dbang chos skyong bzang po ni/ byams pa bsod nams bzang po dang / bsod nams lhun grub sogs dam pa mang po'i dbon rigs su gtsang rong gling ma mkhar du sku 'khrungs/ rigs rus kyi yon tan du mar mnga'/ khyim gyi bya ba dug sbrul gnas pa'i tshang tshing dang / rab tu byung ba ni lha'i khang bzang du gnas pa lta bur gzigs nas/ ngor e wa~M chos ldan du pheb/ mkhan chen grub dbang dpal ldan chos skyong gtsos/ mkhas grub sangs rgyas dpal bzang / mkhan chen bsod nams lhun grub/ rin chen mi 'gyur rgyal mtshan/ 'jam mgon sangs rgyas ye shes sogs dam pa mang po las sdom pa gsum/ gsung ngag rin po che'i chos skor yongs rdzogs/ dgyes pa rdo rje sogs dkyil 'khor mang po'i dbang lung khrid gsum/ gzhan yang sgrub thabs rjes gnang / sa skya bka' 'bum sogs pod mang po'i lung bcas gsan cing / thos pa dang bsam pas sgro 'dogs chod par mdzad/ kye rdor/ 'jigs byed/ kun rig sogs yi dam mang po'i bsnyen sgrub tshul bzhin bgyis/ 'jam dbyangs dkon mchog grags pa'i gdan tshab tu ngor chen rdo rje 'chang gi chos khri la mnga' gsol/ gsung ngag lam 'bras/ so byang sngags gsum sogs zab chos mtha' yas pa lo grangs du ma'i bar du slob tshogs rgya mtsho lta bu'i rgyud smin par bya ba sogs kyis thub bstan phyogs brgyar 'phel ba'i dpal du gyur/ byams pa phun tshogs don grub/ mkhas grub kun dga' bsod nams/ byams pa nam mkha' 'chi med sogs mkhas grub kyi slob ma du mar spel/ sku tshe'i mjug tu bod chen po'i ljongs su byon nas sde dge chos rgyal chen po dang / gling gdung brgyud sogs mi chen mang po'i mchod gnas mdzad/ dpal ldan lhun grub steng sogs chos sde mang por bshad sgrub spel bar mdzad pa sogs 'brel