tshad don ldan gyi skyes bu dam pa gdon mi za ba zhig go/
! gdan rabs bzhi bcu pa mkhas grub sangs rgyas grags pa ni/ mdo smad mi nyag gi yul bzhag ra lha rtse'i rgyab sha grong zhes par dam pa'i rigs su mtshan dpe'i me tog bzhad/ sngon gyi dge ba'i bag chags kyis bskul nas gtsang stod 'og min e wa~M chos ldan du pheb/ byams pa nam mkha' bsam 'grub dpal bzang po'i drung nas sdom pa gsum gyi bdud rtsi thog mar gsol/ rgyud chung bzhi dang / kun tu dgos pa'i gzhung bdun sogs thugs 'dzin che/ de nas mkhan chen dpal ldan chos skyong / mkhas grub sangs rgyas dpal bzang / 'jam mgon bsod nams lhun grub sogs dam pa mang po las ngor lugs dkyil 'khor bdun sogs dbang chen dang / sgrub rjes du mar/ bde kye gsang 'jigs sogs kyi khrid dang byin rlabs/ gong ma lnga/ ngor chen yab sras sogs kyi bka' 'bum lung sogs dam pa'i chos kyi bdud rtsi dpag tu med par gsol/ mdo sngags kyi gzhung la thos bsam gyis dpyad pa tshul bzhin mdzad/ zab don gyi gnad la sgom pas nyams rtogs rgyas/ ngag dbang chos skyong bzang po'i gdan tshab tu thub mchog bstan pa'i gsal byed ngor chen rdo rje 'chang gi khri la mnga' gsol gyi me tog bkram/ dbus gtsang khams gsum nas 'ongs pa'i skal ldan gyi slob bu rnams la sdom pa gsum dang / gsung ngag rin po che sogs chos kyi 'khor lo rgya che bar yun ring du bskor/ mkhas grub kun dga' bsod nams/ byams pa nam mkha' 'chi med/ mkhas grub ngag dbang dam chos sogs bstan 'dzin gyi slob tshogs du mar spel bar mdzad pa sogs rnam dkar gyi phrin las gdul bya'i blo'i spyod yul las 'das pa'i rdo rje 'dzin pa chen po zhig go/
! gdan rabs zhe gcig pa ngag dbang phun tshogs don grub ni/ 'jam dbyangs dkon mchog grags pa'i dbon rigs su mi nyag bzhag ra lha rtse'i byang ngos rgyal bzang zhes par bsam bzhin srid pa nye bar bzung / sku chung ngu nas bstan la lhag par dad de khyim thabs kyi bya ba gzhi mdo'i rtsa bzhin dor nas/ bstan pa rin po che'i sgor 'jug par bya ba'i phyir du dpal e wa~M chos ldan gyi gnas su pheb/ rgyud chung bzhi dang / kun tu dgos pa'i gzhung bdun sogs thugs la mnga'/ 'jam dbyangs dkon mchog grags pa/ ngag dbang chos skyong bzang po sogs rigs bdag tu bsten nas/ chos phung brgyad khri'i snying po sdom pa gsum dang / gsung ngag lam 'bras/ bde kye gsang gsum/ dmar nag 'jigs gsum/ sgrub thabs rgya mtsho dang brgya rtsa sogs gsan cing thugs nyams su bzhes/ thos bsam sgom pas rang rgyud tshul bzhin smin par mdzad pa'i mthus/ mkhas grub sangs rgyas grags pa'i gdan tshab tu kun mkhyen e wa~M pa'i khri la mnga' gsol/ snyan brgyud tshad ma bzhi ldan gyi zab khrid gsung ngag rin po ches gtsos dbang khrid lung sogs 'chad pas blo gsal slob bu'i tshogs mtha' yas pa smin par mdzad/ mkhas grub ngag dbang dam chos/ mkhan chen bsod nams dpal 'byor sogs brgyud 'dzin gyi dam pa mang po bskyed pa sogs bstan pa rin po che la phyag rjes rlabs chen mdzad pa'i dam pa zhig go/
! gdan rabs zhe gnyis pa mkhas grub kun dga' bsod nams ni/ mdo smad brag mgo rta dmar zhes par ya rabs drwa ma'i rigs su sku 'khrungs/ dal 'byor gyi rten la rang gzhan gyi phan bde rlabs po che