bzang pos las slob sogs skyes chen 'ba' zhig gis dad pa'i dge 'dun grangs tshang ba'i dbus su tshigs gsum rim nos kyi bsnyen par rdzogs/ sems bskyed kyi sdom pa bzhes te blang dor gyi gnas rnams spyan 'bras bzhin bsrungs/ mkhan chen de nyid las slob bshad dang / rnal 'byor 'jam dpal bzang po las tshogs bshad yongs rdzogs gsan/ gzhan yang dpal ldan chos kyi rgyal mtshan/ ngag dbang blo gros bstan 'dzin/ kun dga' bstan pa'i blo gros sogs las dbang chos du ma gsan/ kye rdor sogs kyi gzhi'i bsnyen pha mthar phyin/ chen po gling gi mchod gnas su gdan drangs/ lo du ma la 'brel tshad don ldan du bskyangs/ nyag dgra'i rtsub 'gyur ched du dgongs pa'i tshul gyis dbus gtsang du bteg /dad rdzas rnams mchod 'bul kho nar smin/ ngor chen rdo rje 'chang gi chos kyi khri la mnga' gsol/ stod mnga' ri nas smad rgya mtshams yan du skal ldan bsam gyis mi khyab pa sdom pa gsum gyis smin par mdzad/ thar rtse rdo rje 'chang byams pa kun dga' bstan pa'i rgyal mtshan gyi drung nas gsung ngag slob bshad khrid yig gnyis kyi steng nas gsung bshad zhib rgyas dang / 'khor 'das dbyer med kyi lta ba rig thog nas ngo sprod pa sogs dbang khrid byin rlabs lung bcas tshang phrugs su gsan/ gnas lnga rig pa 'jigs med dpal ldan drung nas dbyangs can sgra gzhung dang / snyan ngag le'u gsum mthar phyin sbyang bar mdzad/ yang mkhan chen de nyid kyi drung nas ngor lugs dkyil 'khor sogs rgyud sde rab tu mang po dang / mkha' spyod ma sogs byin rlabs rjes gnang rab tu mang po/ sa skya dang / zhu dag sogs kyi gsung 'bum dang / thun mong ma yin pa'i be'u bum skor dang / khu na mchog sprul sogs dam pa mang po las bka' chos du ma gsan/ gsung rtsom rigs snyan ngag le'u gsum gyi dpe brjod tshig rgyan nyams 'gyur phun sum tshogs pa dang / chab shog rigs 'ga' zhig bzhugs/ skyes sbyangs kyi mkhyen rab me long dwangs pas gzhung lugs rnams gzigs pa tsam gyis thugs su chud/ gsung las skyes pa'i slob ma/ ngag dbang blo gros snying po/ sde dge lha sras bla ma/ gling lha sras/ 'jigs med dpal ldan sogs mang du byon/ mnyam rjes dbyer med kyi sgrub pa snying por mdzad pas grub pa'i rtags ngo mtshar ba mang po shar/ chos brgyad ring du spangs pas byang chub kyi sems gnyis 'byongs/ thugs rje dang mkhyen rab phul du son kyang sku tshe ha cang ring por ma bzhugs pas mkhas tshul gsum gyi phrin las cher ma rgyas/ bya lor hor zla bcu pa'i tshes la ngo mtshar ba'i ltas dang bcas gzugs sku'i bkod pa dbyings su bsdus pa sogs rnam thar mdun drung 'jam dbyangs chos 'phel gyis bris pa las rtogs par bya'o// //
! gdan rabs nga drug pa dpal ldan blo gros rgyal mtshan dpal bzang po ni/ gtsang pad nang du byams pa dpal ldan bzang po'i rigs su yab yum sngon smon legs byas las bsdus pa'i sras su lcags byi lor dge mtshan du ma dang bcas sku bltams/ sku na chung dus zhwa ser cod pan 'chang ba dga' ba gdong gi grwa sar zhugs par/ mkhan chen kun dga' bstan pa'i blo gros kyi dgongs pa ye shes gzigs pa'i me long ngos/ rgyal ba rdo rje 'chang ngur smrig 'chang ba'i rnam rol tu byon pa e wa~M pa'i mi 'jigs seng khrir 'dzegs te zab rgyas