gdams pa'i bcud kyis skal ldan bgrang yas thar par dkri ba'i rnam 'dren khyu mchog chen por gzigs pas byams pa dpal ldan bzang po'i dbon rigs yin tshul gsungs/ bdag thob kyi khur bzhes/ ngor phan bde bla brang du spyan drangs/ ngor pa'i tshogs 'don skor/ rgyud chung bzhi/ kun tu dgos pa'i gzhung bdun sogs slob gnyer phul bas thugs rig zab pa'i rtser son/ jo bo bka' gdams pa'i spyod tshul gdod nas lhan cig skyes/ thog mar byams pa kun dga' bstan 'dzin gyis 'chi bdag bdud las rgyal zhing sku tshe mdzad phrin mthar phyin pa'i rten 'byung du rdo rje 'jigs byed lha dgu'i dbang bzhi stsal bzhes/ byams pa kun dga' bstan pa'i rgyal mtshan drung nas rab tu byung zhing bsnyen par rdzogs/ khyad par gnyis ldan gyi sems bskyed zhus/ gnang bkag gi bslab gzhi'i mtshams las nam yang ma 'das/ kye rdor bka' babs bzhi lam 'bras tshogs bshad sogs bka' chos mang du gsan te sum ldan rdo rje 'dzin pa chen por mngon du gyur kyang zhabs drung gi mtshan gsol/ mdo smad sa'i char 'di'i gdul bya dad pa'i skya rengs kyis bskul bas ma 'dris mdza' bshes mdzad pa'i bka' drin can lung rtogs chos kyi nyi ma srid 'dir mchod zhing du pheb/ kun dga' bstan pa'i blo gros/ 'jam mgon ngag dbang legs grub/ chos rje kun dga' dpal ldan rnams las bka' chos zab gnad can 'ga' zhig gsan/ khyad par thams cad mkhyen pa 'jam dbyangs mkhyen brtse'i dbang po'i zhal snga nas sgrub thabs kun btus/ dpal kye rdo rje'i rgyud kyi bshad bka' yongs rdzogs/ mkha' spyod khrid sogs lo shas gsan/ mkhas mchog 'jam dbyangs yon tan drung nas sum rtags dang / snyan ngag /gnas lnga rig pa 'jigs med dpal ldan drung nas dbyangs can sgra mdo/ sdeb sbyor rin 'byung sogs snga phyir sbyangs stobs rgya cher bskyangs/ khrom gnyen shul du skal ldan slob tshogs la lam 'bras tshogs bshad kyi dga' ston spel/ 'di skabs nyag dgras bstan dang 'gro la sdug sbyor gyi bya ba brdol yang sku nyid chos srung 'phrin las kyi rwa ba brtan pas bar chad kyis nyer ma nus/ lo bcu phrag skor bzhugs/ skye rgur 'brel tshad don ldan gyi phrin las spel/ slar gdan sar pheb/ dngos po gya nom pa'i kun bzang mchod sprin la co 'dri ba mchod zhing spros pas tshogs zung rgya mtsho mngon par bsgrubs te rdo rje 'chang gi mi 'jigs seng khrir mnga' gsol/ bgrang bya rgyal srid grangs ldan rgyal ba rdo rje 'chang gi phrin las la dbang bsgyur/ skal ldan 'dus tshogs la so byang sngags gsum lam 'bras sogs sngon srol ltar nyams med stsal/ lhag par rdo rje 'chang byams pa kun dga' bstan pa'i rgyal mtshan gyi gnang ba stsal bzhin dbyar chos chen mo'i rgyun gsar spel mdzad/ mkhan chen de nyid kyi drung nas slob bshad khrid yig gnyis kyi steng nas gsung bshad zhib rgyas/ 'khor 'das dbyer med kyi lta ba dgongs pa'i dbyings su ngo sprod sim pa/ dbang khrid byin rlabs lung bcas tshang phrugs su stsal bas mtshon rdo rje 'chang gi thugs rgyud zab rgyas gdams pa'i bcud kyis yongs su 'gengs pa'i bum bzang la longs su spyod pa'i skal bar ldan/ de nas mkhan po'i 'gan bzhes thar rtser phul/ slar khams phyogs 'dir pheb lam skye rgu don grub gling du rdo rje phreng ba'i chos 'khor