bskor bas mtshon 'gro don shin tu che/ rim bzhin sde dge lhun grub steng 'chags pheb bzhugs khrir 'jags/ mkhas grub nor bstan/ li thang chos rje mkhas grub rgya mtsho/ lnga rigs smra ba 'jam dbyangs yon tan/ lhun grub steng shar nub chos rje sogs 'dus tshogs brgya phrag lnga tsam la sgrub thabs kun btus kha skong bcas snga phyir stsal/ khrom sde gzhung mkhas grub chen po lung rig nyi mas gtsos skal ldan grangs mang la sgrub btus dang slob bshad sogs snga phyir dgongs pa 'gengs nges bka' drin stsal/ dar mdo mgo tham sogs su gdul bya 'dul bar 'azigs pas pheb/ skye rgu'i mos snang chos la bsgyur pas thar pa'i sa bon rma med stsal/ gzhan yang 'jam mgon yon tan rgya mtsho/ chos rje kun dga' 'jam dbyangs/ khri chen kun dga' bsod nams/ dpal ldan phyogs kyi glang po/ rje btsun rta mgrin dbang mo/ 'jam dbyangs mi pham rnam rgyal sogs dam pa du ma'i mdun nas dbang lung khrid sogs rang lugs grub mtha' rgya mtshor srid do cog gsan bzhes mdzad pa phul phyin/ gsung rtsom rigs/ snyan ngag dper brjod snyan 'jebs phun sum tshogs pa/ rigs gsum spyi'i rjes gnang gi cho ga /chab shog rigs/ dgon sde so sor bslab bya'i bca' yig /nyid kyi bla ma'i rnal 'byor sogs mkhas rnams mgu zhing sor bcu'i thal mo spyi bor sbyar 'os can gyi gsung rtsom kyang mang bar bzhugs/ sde dge dang mchod yon thugs nang shin tu gshim pas slar yang mchod yon gnyis ka dbus gtsang dag zhing du pheb/ rje 'di'i e wa~M gtsug lag dri gtsang khang du mchod cha yod byad rigs rten gzhag rgya cher mdzad/ ngor dgon/ sa skya gong / bkra shis lhun po sogs dbus gtsang dgon gnas bzhugs so 'tshal la dngos po bzang nom ldan pa'i mchod sprin spros/ gong ma 'jigs med dbang rgyal/ 'dzam gling che rgu dbang sdud/ rgyal dbang rin po che sogs 'dzam gling skyabs kyi gtso bo de dag la'ang mchod sprin spro ba dang skal ba bzang ba'i dga' ston du chos kyi bka' drin re stsal bzhes mdzad/ lha ldan jo shAka rnam gnyis drung stong mchod rgyas pa phul zhing bstan pa dar rgyas dang sems can bde skyid 'byung ba'i thugs smon rnam dag mdzad pas bsod nams kyi tshogs chen spel bar mdzad/ slar yang mchod yon lhan cig sde dge lhun grub steng du pheb ste bzhugs khrir 'jags/ grol ba bzhi ldan du grags pa'i rten mchog dri med rnam gnyis kyi mchod rten khyad 'phags 'gro kun bsod nams bsag pa'i mchod sdong du bzhengs/ mnyam rjes kun tu lta ba zab mo las nam yang g.yo ba med bzhin pas chag med rnam bzhi sogs zab gsal ting nge 'dzin las nyin mtshan khor yug tu brtson pa lhur bzhes pas grub pa'i nyams rtogs rgyas/ lha dang bla mas mngon sum rjes su bzung ba sogs ni thugs sgam pa'i dbang gis mchog dman su la'ang gsungs pa'i skal ba ma byung bas 'dir ma spros/ zhal slob mkhan chen ngag dbang blo gros snying po/ ngag dbang kun dga' bstan pa'i rgyal mtshan/ mi pham 'jam dbyangs rnam rgyal/ legs bshad bzang po/ lung rig nyi ma/ 'jam dbyangs mkhyen rab/ nyi ma chos 'phel/ mkhas grub rgya mtsho/ bla ma chos rje/ sde dge chos rgyal sku mched yab sras sogs bstan pa 'dzin pa'i skyes chen du ma zhig bskrun/ dgung grangs re gcig bzhes pa lcags byi lor zla