[A:513]dbus khams sogs kyi slob ma sbyin bdag mang po la legs nyes lung bstan pa thams cad ji lta ba bzhin du gyur pa dang gson 'dre'am shi 'dre sogs sems can dang yul khams la gnod pa la snying rje chen po'i sgo nas byang chog tsam gnang bas gnod pa tha dag zhi zhing 'dre gdon de rnams mi'am gnas 'di lta bu zhig tu skyes song zhes lag mthil du skyu ru ra bzhag pa bzhin bsgribs med du gzigs shing / sems can la 'dre gdon babs pa'i gnod pa sogs la ljags chab/ ljags gul lam/ srung skud dam/ bka' bsgo tsam gnang bas kyang tshad med du zhi zhing slar 'jug mi nus pa sogs mkhyen brtse nus gsum gyi yon tan brjod kyis mi lang zhing so so skye bo'i blo yul las 'das pa nyid do/ /de lta bu'i bla ma 'jam pa'i dbyangs de nyid gdul bya rtag 'dzin can la dgongs pa'i dbang gi shing pho spre'u'i lor bsnyung ba'i tshul bstan nas/ sman dpyad dang sku rim spangs dag sogs ji ltar bsgrubs kyang skyed ma byung / bu slob sbyin bdag rnams kyis zhabs pad bskal brgyar brtan cing bzhugs dgos tshul legs 'bul dpag med bcas mgrin gcig tu gsol ba btab pas/ lo gcig tsam bzhugs par zhal gyis bzhes/ de nas sa skyong khu dbon gyis dgongs par/ snga sor sa ngor rtse gsum sogs gtsang dbus kyi mkhas grub mang pos lo gsum nas yar phebs dgos tshul dang /