[A:551]ma/ gtsug lag khang du dus thang che legs bzhengs pa/ dus ja'i rten sogs rje nyid kyi sku chas rnams phal cher bla brang rang du sbyar ba dang / bdag dpal chos nas kyang dngul rta rmig ma rdo tshad gnyis dang / ja 'khor drug brgya tham par sbyor 'jags zhus shing / gdan sar thar pa rtse mtshungs med nam mkha' bsam 'grub pa spyan drangs te/ rtsis 'bul yang dag par zhus pa sogs thugs kyi dgos pa yongs su rdzogs pa'i thabs mchog bla na med par bsgrubs pas zhing 'di'i mdzad pa re zhig mthar phyin pa nyid do// //bdag sogs 'gro ba rnams kyi skyabs mgon byams pa nam mkha' bsam 'grub dpal bzang po'am/ mtshan gzhan kun dga' mtshan dpes rgyal mtshan du grags pa 'di nyid ni/ zhabs drung nam mkha' sangs rgyas/ nam mkha' rin chen/ zhwa lu mkhan chen shes rab rgya mtsho sogs skyes chen du ma'i 'khrungs yul shab stod rje lung zhes par/ yab brang ti pa'i dbon rigs las gyes pa 'jam dbyangs shes bya bzang po'i sku mched rgyal po lags zhes pa'i sras dbon po g.yang 'dzom du grags pa dang / yum rgyal mkhar rtse pa chos rgyal rab brtan kun bzang gi rigs rgyud zhal dkar mas sangs su grags pa'i sras mo dbon sa tshe bkras shes gnyis kyi sras su/ 'dzin byed ces pa me pho byi ba'i lo stod du res gza' lha'i bla mas skar ma smin drug la spyod pa'i dus tshes bzang por sku 'khrungs/ mtshan padma zhes gsol nas yab yum gyis bskyed bsrings te/ dgung lo bzhi tsam du phebs dus khu bo shes