[A:53b]ba'i gdams ngag khyad par can dpal ldan a ti sha la mnga' ba de gtso bor 'brom ston pas thob par mdzad cing / bshes gnyen ston pa'i rjes 'jug sku mched gsum la sogs pa rnams la yang bka' gdams pa zhes mtshan du grags la/ ston pas mdzad pa'i lha chos bdun ldan chung ba las/ ngo mtshar bka' ni sde snod gsum po ste/ /gdams pa skyes bu gsum gyis phyug pa yin/ /bka' gdams rin chen gser gyi phreng ba la/ /'gro ba gang gis bgrangs kyang don yod 'gyur/ /zhes pa nas/ bdag gi bla ma 'gran gyi do med 'di/ /tshul khrims gos can lta ba'i rnal 'byor pa/ /ye shes lus can mtshan dang dpe byad ldan/ /log pa'i chos las nges par 'das pa yin/ /e ma ya mtshan bsam gyis mi khyab pa'i/ /bde bar gshegs pa rgyal ba gnyis pa 'di'i/ /brgyud par bcas pa'i rjes su 'brang du byung / /de yis kho bo bod du lus blangs kyang / /bsod nams mi chung shin tu skal ba bzang / /zhes pa'i bar gsungs so/ de ltar 'brom ston jo bo dang mjal ba'i dus dang / bsten pa'i lo grangs la mi mthun pa mang yang 'di las gzhan du 'dod pa ma dag par mngon no/ /jo bo dga' ldan du gshegs nas/ ka ba shAkya dbang phyug sogs bod ston rnams kyis jo bo'i 'das mchod chen po snye thang du btang / ston pas snye thang du lo gcig bzhugs/ jo bo'i gdung dang rten gsum sogs spyan drangs te/ shing mo lug gi lo la ra sgreng du byon/ dgon pa'i sa spyad gzigs pas shin tu legs par dgongs te/ brag seng ge'i zhol du mnal lam brtags pas/