[A:55b]mar ba jo legs/ bran ka jo btsun/ sum sgom dbang phyug 'od zer/ rnal 'byor pa g.yung drung rgyal mtshan ste 'di rnams jo bo dang ston pa thun mong pa'i slob ma/ yi dam lha zhal gzigs pa/ skyes bu chen po'i lam la bzhugs pa sha stag go /sras kyi thu bo ni sku mched gsum po nyid yin la/ kha cig khams lung pa dang sku mched bzhir yang 'dod de/ 'dis yung nga'i khams lung du dgon pa btab/ 'gro don mdzad cing lo go bzhi bzhugs so/ /gzhan yang zhang ye shes rgyal mtshan/ brag rgyab pa gnyan ston shAkya 'byung / mnga' ris pa 'dul 'dzin rug pa'i zhang chen po/ rnam thar gtsang ba'i ka skyog pa chen po/ 'dzin sgom yon tan 'bar/ sgro byang chub tshul khrims/ a mi thar pa rgyal mtshan/ a mi sman la sogs pa de rnams bshes gnyen ston pa'i slob ma thun mong ma yin par grags che ba rnams yin no/ /de ltar slob ma rnams smin par mdzad de/ lo dgur bstan pa'i mnga' bdag mdzad nas drug cu re gcig pa 'brug lo la ra sgreng nas/ rje btsun byams pa'i drung na jo bo rje nyid lha'i bu nam mkha' dri ma med pa zhes bya bar bzhugs pa'i drung du gshegs/ bka' gdams kyi gsungs rab dag las/ ston pa ni lha'i bu rgyal ba rgyal mtsho/ ka ba shAkya dbang phyug ni lha'i bu shAkya dri med/ rngog legs shes ni lha'i bu shes rab sgron ma/ lo tsA ba nag tsho ni lha'i bu tshul khrims ldan zhes bya bar 'gyur bar gsungs so/ /de'i srol 'dzin byon tshul la gsum/ ra sgreng du byon tshul/ sku mched gsum byon tshul/ de las 'phel ba'i slob brgyud byon tshul lo/ /dang po ni/ rnal 'byor