[A:65b] srin mo mnan du sleb pa na/ glang ri thang pas mkhyen nas der byon/ bgegs bskrad/ gtor mas byin gyis brlabs pas mi'i lus su gyur/ stong nyid snying rje thugs su chud de slob ma'i mchog tu gyur/ jo bo'i slob ma bshes gnyen bal po bas btab pa'i lcags ri gong khar bzhugs pas rgya lcags ri bar grags/ gzhan yang slob ma che ba dge bshes lcags zhing ba/ khyung po rnal 'byor/ rA lo tsA ba/ gnyan chen po/ zhang zhung pa/ mdo sde pa sogs byon la/ zhang sha ra ba chen po ni/ pa tshab rom po'i rgyud du khyi lo la yum phyugs skyong ba'i dus rdo leb steng du 'khrungs te/ de la zhabs rjes kyang byon/ dgung lo bco brgyad la rlung shod phyor bar bros te rab tu byung / mtshan yon tan grags su btags/ de nas spyan snga phyor phur sku 'tshams mdzad pa'i sar mjal/ zla ba bzhi mtshams khrod du bzhugs te chos gsan/ da nga'i grogs po'i rtsar rgyugs gsungs pas/ stag lung du po to ba'i spyan sngar byon/ grwa pa lo dgu nang mi lo dgu ste bco brgyad bsten/ zhar la phu chung pa dang / spyan snga la 'dod chos rdzogs par gsan/ po to ba gshegs nas/ yon tan gyi rjes su 'brang ba'i 'khor rnams dang lhan cig thog mar rlung shod du byon te tshogs bsdus/ de nas gnas nges med du 'chad nyan mdzad pas/ grwa pa nyis stong brgyad brgya tsam 'dus/ de rnams phal cher chos don du gnyer ba sha stag go /de yang bshes gnyen ston pa/ rnal 'byor ba/ dgon pa ba/ sku mched gsum pa/ sne'u zur pa/