[A:86a]sras bzang po/ gsang ba'i bdag pos byin gyis brlabs pa nam mkha' rgyal mtshan dang bzhi ni lho brag thig phyir byon no/ /yang bka' gdams gzhung pa'i brgyud pa/ se spyi phu ba yan sngar bzhin la/ de nas lha lung gi dbang phyug dang / 'gro mgon gyi slob ma zangs chen pa dar ma bsod nams/ de'i slob ma mtsho sna pa chen po shes rab bzang po/ de'i slob ma mon grab pa tshul khrims bkra shis/ de'i slob ma mkhan chen chos skyabs bzang po'o/ /yang mkhan chen chos skyabs pa dang / gsang bdag nam mkha' rgyal mtshan gyi drung du rje blo bzang grags pas bka' gdams gzhung gdams ngag gi chos rnams gsan nas gro lung pa'i bstan rim la gzhi mdzad de/ byang chub lam sgron gyi don 'grel lam rim che chung brtsams te bka' gdams pa'i brgyud 'dzin du nan gyis 'jug par mdzad do/ /jo bo a ti sha'i sras kyi thu bo gnyis pa/ rngog lo tsA ba'i bshad brgyud 'dzin pa ni gangs can gyi ljongs 'dir bstan pa spyi la bka' drin che bas/ de'i byon tshul sngon gyi yi ge las 'byung ba bzhin bshad na/ kha ba can gyi ljongs 'brog tsho dang nye ba'i sar/ sngags rnying ma ba'i dge bshes rdo rje gzhon nu bya ba la/ sras lnga yod pa'i che shos rngog legs pa'i shes rab kyis/ spyir jo bo chen po lo bcu bsten cing phyag phyir byon pa'i dus su/ gsang phu la phyag mdzub btsugs te/ lung pa ya gi'i nang na dung g.yas su 'khyil ba 'dra ba yod/ der legs she khyod kyis gtsug lag khang thob la/ bshad