[A:90b]ngas spyan drangs pas/ jo bo'i lo rgyus la shin tu mkhas pa yin te/ khyod min pa rtsad gcod pa rang yang ma byung gsungs nas/ lo rgyus chen mo lam yig de'i dus su gsungs/ sgrub pa'i gdams ngag kyang ma lus pa gnang ste/ nyin re la chos thun gsum gsum gsungs/ theg pa chen po sngags kyi sgor yang bcug ste/ dbyar re la sngags kyi glegs bam drug cu tsam thon par byas te lo gsum bzhugs/ bstan rim gyi mtshan 'dogs lugs kyang / yung nga ba'i gsung bzhin du 'dug gsungs/ de nas mar 'byon khar/ khyod kyis sgrub pa'i gnas 'di lta bu cig tu sgrubs shig 'phags pa spyan ras gzigs zhal mthong par 'gyur ro zhes/ lag sor dgon pa'i lung bstan yang mdzad/ de nas mar la skyel thung mdzad de/ 'gro chos shig zhus pas/ gong thang pa'i zhal nas/ dal 'byor rten cig shes rab can/ /tshe 'di ji ltar byas kyang phyi/ /bla med byang chub rnyed dka' bas/ /'bad pa chen po bya 'tshal lo/ /zhes pa la brten nas chos thun gcig gsungs/ der theg pa chen po mtha' dag gi chos ma lus pa 'dus pa yin gsungs/ de nas mar byon/ phod mdo bas sne len bzang du byas te/ bstan pa la phan pa'i chos shig zhu zer bas/ mdo rtsa dang bslab pa kun las btus pa gnyis gsungs/ de nas tshe 'di'i bya ba thams cad ling gis bskyur nas bla mas lung bstan pa'i gnas lag sor dgon