[A:90a]mkha' ru ba snga ma/ lo tsA ba nag tsho/ jo bo legs dang brgyad/ nying slob mkha' ru ba phyi ma/ dge bshes yung nga ba dang bcu la bsten nas bshad pa dang sgrub pa'i gdams pa dang / jo bo'i lo rgyus rtsad bcad pas/ jo bo dngos kyi slob ma rnams gsung mthun par byung / nying slob gnyis gsung ma mthun te/ khyad par du bstan rim gyi mtshan 'dogs lugs la/ mkha' ru ba phyi ma'i zhal nas/ bstan pa'i srol kha bya ba yin gsungs/ yung nga ba'i zhal nas/ khyod kyi slob dpon blo rtul bas ma zin par snang / bla ma rnams bstan pa'i rim pa zhes gsungs pa yin/ de yang / tshul gnas thos dang bsam ldan pas/ /sgom pa la ni rab tu sbyor/ /bya ba'i don yin gsungs/ de nas rong pa phyag sor ba'i dgongs pa la/ jo bo dngos la lo bcu dgu bsten pa'i lo tsA ba chen po de/ da dung mnga' ris gung thang na bzhugs yod 'dug pas/ jo bo dngos su bzhugs kyang lo tsA ba bar du 'jug dgos pas/ de rang la cig gtug dgos dgongs nas mang yul du byon pas/ lo tsA ba chen po de gung thang yang thog gi gtsug lag khang na bzhugs pa'i drung du byon nas/ dang por gsang sngags kyi gdams pa che chung mang du zhus nas bag phab/ de nas phyi de lo la pha rol tu phyin pa'i sgrub pa'i gdams pa dang / jo bo chen po'i sku che ba'i yon tan dang / bod du spyan drangs lugs gsung bar zhu ba phul bas/ lo tsA ba'i zhal nas/ de la nga mkhas pa yin/ lo dgu bsten/ bod du