[A:101a]che chung dang / bla ma rnams kyi gsung las mang du thob kyang 'dir rgyas par ma spros shing / deng sang dus kyi dbang gis lugs 'di dag don du gnyer ba dka' bar snang yang / 'di dag la brten nas kyang rags pa tsam rtogs shing / zhib tu 'tshol ba'i sgor 'gyur ba srid dam snyam nas bkod la/ blo gros dang ldan zhing / bka' gdams brgyud pa 'di la dad pa dang ldan pa rnams kyis ji ltar rigs pa bsnan cing spel bar bya'o/ /'dir smras pa/ thog mtha' bar gsum dge ba rgyal ba'i bka'/ /de don bslab pa gsum gyis rgyud gtams pa'i/ /bshes gnyen dam pa rim par byon rnams kyi/ /rnam thar dran pas slar yang phyag bgyi 'o/ /de lta'i skyes chen rnams kyis gangs ljongs 'dir/ /zab rgyas chos kyi sgron me cher sbar nas/ /bod yul rmongs pa'i mun pa bsal tshul gyi/ /gtam 'di dpyod ldan yid rab 'phrog byed yin/ /sngon tshe chos rgyal byang chub sems dpa' yis/ /bstan 'gro'i ched du rang gi srog kyang btang / /'di 'dra thos kyang ji snyam mi sems pa'i/ /snyigs ma'i skye bo 'di kun ches rab blun/ /kho bo sngon bsags las kyi 'phro bzang bas/ /phan bde'i 'byung gnas bstan pa rin chen rgyun/ /phyogs gcig ma yin kun kyang rgyas 'dod pa/ /'di la dkon mchog thugs rjes cis mi gzigs/ /chos sgor zhugs nas mkhas btsun bzang gsum gyi/ /yon tan thob kyang tshe 'di'i che thabs la/ /gcig tu gzhol bas mi tshe stong zad mkhan/ /deng sang chos pa phal gyi rnam thar lags/ /dkon mchog dad