[A:10b]ba klu sgrub kyi spyan sngar rab tu byung ste/ rig gnas mtha' dag la mkhas par gyur pa des/ ma gom zhes pa lha dbang phyug gis mngal skyes thams cad kyis mi thub par byin gyis brlabs pa btul nas/ phyis nang pa la zhugs nas slob dpon dpa' bo zhes pa dang / slob dpon sangs rgyas skyang ces pa mchog brnyes pa dang / slob dpon legs ldan 'byed ces pa sku lus de nyid kyis spyan ras gzigs kyi zhing khams su gshegs par grags pa dang / slob dpon na ga bo dhi zhes rig pa 'dzin pa'i sa thob nas/ lho phyogs dpal gyi ri la da lta'ang bzhugs nas skal bar ldan pa rnams dngos su byin gyis rlob pa sogs mchog thun mong gi dngos grub brnyes pa'i slob ma bsam gyis mi khyab pa byon pa'i nang nas 'phags pa'i dgongs pa gsal bar mdzad pa'i mchog go /dpal ldan zla ba grags pa ni yul rgya gar lho phyogs sa ma Na zhes pa'i grong sa man tar/ yab bram ze 'gre ri/ yum zla ba'i sgron ma gnyis la sras med pa/ lha dbang phyug chen po la gsol ba btab pas/ khye'u mtshan dang ldan pa rme ba'i ga shal can gcig 'khrungs/ /mtshan mkhan la bstan pas/ 'di ming zla ba grags pa ste/ /stong nyid ting 'dzin smra bar byed/ /ces dang / de nas dbang phyug chen po la dris pas/ 'di ming zla ba grags pa ste/ /'di ni nga yi rigs 'das nas/ /sgra gcan 'dzin nas bdun 'das pa'i/ /mkhan po zla ba'i mgon po la/ /na lendra yi gtsug lag khang / /rab byung dge slong chen por 'gyur/ /stong nyid ting 'dzin smra bar byed/ /sangs rgyas