[A:16b]dpag tu med pa'i bla mar mkhyen nas/ mtshan thos pa tsam gyis dad gus tshad med pa 'khrungs/ brtson pa chen pos paNDi ta sa'i snying po la sogs pa'i 'khor mang po dang bcas te/ nor bu len pa'i tshong pa dang 'grogs nas gzings chen po bcas te byon pa la/ dbang phyug la sogs pas bar gcod brtsams te/ rlung dmar g.yo ba dang / thog 'bebs pa dang / chu srin nya mid la sogs pa gdug rtsub can mang po'i gnod par brtsams kyang / de dag gi gnod pa bya bar ma nus shing / gshin rje gshed kyi skur sprul nas btul ba dang / gser gling du yang 'dzam bu gling nas paNDi ta chen po gcig 'byon pa'i grags pa byung bas/ dge 'dun rnams kyi bsu ba mdzad tshul sogs rnam thar chos kyi 'byung gnas su gsal lo/ /de nas bla ma dang mjal bas sngar 'dris kyi mi bzhin gcig la gcig gi ngo mkhyen par gyur te/ jo bo'i dbu la phyag bzhag nas shis pa mang po brjod/ bla ma'i zhal nas khyod byams snying rje byang chub kyi sems la slob nus sam 'dir lo bcu gnyis sdod khom mam gsungs pa la/ jo bos zhal gyis bzhes bas mnyes te/ bstan pa'i bdag por mnga' gsol ba'i rten 'brel yin gsungs nas sngar rnyed pa'i ston pa'i gser sku yang gnang / de nas lo ngo bcu gnyis su dbu sngas sbrel te theg pa chen po'i chos mtha' dag gsan/ shing rta chen po'i srol/ rgyal chen spyod pa'i rgyud kyi yon tan thams cad rdzogs par mdzad nas/ jo bo'i bla ma rnams kyi nang nas kyang bka' drin mchog tu che bar 'dzin par mdzad do/ /dbu ma'i lta ba'i gnad