[A:20a]mo nam mkha' la me dpung 'bar ba'i dbus na 'dug pa mthong ste 'gyod nas bshags pa byas/ rjes su gzung bar gsol ba btab pas/ des dbang bskur byin gyis brlabs pas mos kyang dngos grub thob nas rgyal po la smras pas/ rgyal po 'khor dang bcas pa/ slob dpon la mjal du 'ong pa la/ nam mkhar bzhugs nas til mar gyi dpes mtshon pa'i chos zab mo gsungs pas/ rgyal po 'khor bcas dad de nyams su blangs pas mkha' spyod grub ste/ re zhig yul de stong pa tsam du gyur to/ /de'i slob ma nA ro pa ni/ yab kha che ba yin la/ kha cig rgyal rigs su bzhed de/ khung thub las bram ze'i rigs su gsungs pas de la rigs dkar nag brgyad yod pa'i nang nas/ bzang shos nA ro ta pa zhes bya ba'i rigs yin zhing / des dang por sgra la sogs pa rig pa'i gnas thams cad la sbyangs pa'i mkhas pa chen por gyur nas/ phyis sangs rgyas kyi bstan pa la rab tu byung ste/ mtshan dznya na siddhi zhes grags la/ nA ro 'grel chen las/ snyan grags bzang po zhes bshad de/ mtshan brgyad yod pa'i gcig yin no zhes bla ma dag gsungs so/ /de nas sde snod gsum dang rgyud ste bzhi la sbyangs shing yongs rdzogs kyi paNDi tar gyur to/ /de'i tshe dpal na lendra na mkhas pa sgo drug tu grags pa yod pa'i/ shar sgor shantipa/ lho sgor ngag dbang grags pa/ nub sgor sher 'byung blo gros/ dbus na dznyA na mi tra dang / rin chen rdo rje gnyis yod cing / nA ro pa byang sgo bar grags/ des thos bsam nyan bshad kyis 'gro ba'i don