[A:24b]su gzigs/ skye ba dpag tu med pa'i lha yin pas 'bral med du rjes su 'dzin pa yin gsungs/ dgung lo bcu'i bar du yi ge dang / bzo dang / gso spyad dang / lugs kyi bstan bcos rnams la legs par sbyangs/ dgung lo nyer gcig gi bar du sgra dang / tshad ma dang / sgyu rtsal drug cu rtsa bzhi/ zlos gar gyi bstan bcos/ snyan ngag mngon brjod/ rtsis kyi bstan bcos rnams la gtso bor legs par sbyangs/ bram ze dze ta ri/ byang chub bzang po/ rig pa'i khu byug a wa dhu ti pa/ rnal 'byor pa ra hu la gubta/ bod skad du gsang ba'i sgra gcan 'dzin zhes pa rnams la theg pa chen po'i chos mtha' dag dang / khyad par ra hu la la dgyes rdor zhus/ mtshan ye shes gsang ba'i rdo rje zhes bya bar btags/ rgyud man ngag dang bcas pa rdzogs par gsan/ de nas lo drug rig pa brtul zhugs kyi spyod pa mdzad/ khyad par du rgyud sde bzhi la sbyangs pas mkhas shing grub pa brnyes/ yi dam mang po'i zhal gzigs/ ting nge 'dzin dpag tu med pa 'khrungs/ mngon shes lnga thob/ rdo rje rnal 'byor ma dang dngos su zhal mjal/ dkyil 'khor chen po sprul nas dbang bskur te/ rgyud man ngag ma lus par gnang ngo / /de'i tshe sngags la mkhas pa'i thugs rgyal byung ba la/ mkha' 'gro ma rnams kyis u rgyan nas rgyud kyi glegs bam bsam gyis mi khyab pa spyan drangs te thugs rgyal bcag de'i dus su bhaM ga la'i bstan pa phal cher mu stegs pa la shor ba dang / de'i gnas brtan mya ngan du gyur pa la/ jo bo 'di slong mo pa'i tshul gyis bzhugs pa'i tshe/ sku la 'od zer 'phro ba mthong bas mu stegs