[A:27b]ste/ de dus skyes chen rnams kyi gtsug gi nor bu lta bur mnga' gsol ba yin la/ de nas rje btsun gyis kyang rgol ba ngan pa thams cad tshar bcad/ sangs rgyas kyi bstan pa'i srog shing lta bur bzhugs nas/ sde pa tha dad pa rnams kyi byin len la sogs pa blang dor gyi gnas phra mo rnams yan chad ma 'dres par the tshom bcad par mdzad pa yin te/ lo tsA ba'i bstod pa las/ byang chub chen po'i pho brang du/ /thams cad 'dus shing tshogs pa na/ /rang dang gzhan gyi sde pa yi/ /grub mtha' ngan pa'i rgol ba kun/ /seng ge'i nga ro'i sgra skad kyis/ /thams cad kyi ni klad pa 'gems/ /zhes dang / o tan ta'i pu ri na/ /rab byung brgya phrag phyed dang gsum/ /bi kra ma la shI la na/ /rab byung brgya phrag mang po dang / /rtsa ba'i sde bzhi tshang bar bzhugs/ /sde ba'i khe grag khyod mi mdzad/ /ma ga dha yi yul gyi ni/ /gnas gzhi ma lus thams cad kyi/ /ston pa'i 'khor ni bzhi po yi/ /kun gyi gtsug gi nor bur 'gyur/ /khyod ni sde pa bco brgyad kyi/ /kun gyi spyi la bzhugs pas na/ /thams cad kyi ni lung yang len/ /zhes 'byung ba ltar ro/ /de yang bstan pa bsrung ba la/ tshul khrims kyi stobs kyis bsrung ba/ rnal 'byor gyi stobs kyis bsrung ba/ dbang phyug gi stobs kyis bsrung ba/ rig pa'i stobs kyis bsrung pa bzhi las/ de bzhi ka'i stobs kyis sangs rgyas kyi bstan pa bsrung ba ni jo bo rje nyid tsam yin zhes dge ba'i bshes gnyen bka' gdams pa rnams gsungs shing / rgyas par gzhan du blta'o/ /de lta bu'i yon tan phun sum tshogs pa dang ldan pa de bod du spyan drangs pa'i tshul ni/ de yang spyir