[A:28b]par byung zhing / de dag gi rgya dpe bsam yas su bzhugs pa rnams phyis jo bo chen po dpal mar me mdzad ye shes kyis gzigs pas ngo mtshar ba 'khrungs te/ dus der 'byung ba'i bod kyi bstan pa 'dra ba rgya gar du yang byung dka' bar 'dug ces gsungs zhes lam yig las 'byung ngo / /de lta bu'i bstan pa phun sum tshogs pa de yang / rgyal po dar ma zhes pas sdig can gyi blon po dang bgros te/ rab tu byung ba mang po khyim par phab cing / rtags 'dor du ma 'dod pa rnams bkrongs nas/ bstan pa rin po che bsnubs so/ /de'i dus sngags kyi bstan pa 'dzin par rlom pa'i khyim pa mang pos rang gi yi dam tsam la rten pa dang / sngags kyi glegs bam lus pa rnams chud ma zos par byas kyang / bshad sgrub kyi bstan pa rnal ma med pas rgyud don log par 'grel ba dang / mngon spyod kyi las gtso bor byed pa mang du byung ngo / /dus der gtsang rab gsal la sogs pa dge slong gsum dpal chu bo rir sgrub pa mdzad cing bzhugs pa la/ rgyal pos bstan pa bsnubs pa gsan pas/ 'dul ba'i dpe mang du bsnams nas bros te rim gyis mdo smad kyi char byon nas/ bla chen dgongs pa rab gsal rab tu byung ba dang bsnyen par rdzogs par mdzad de/ bla chen gyis kyang dge slong dang dge tshul mang du spel la/ de nas bla ma chen po nyid kyis dge slong gsum po de las 'ong pa'i 'dul ba dang mngon pa'i sde snod mang po dag dang / bla ma gzhan las kyang sngags dang pha rol tu phyin pa'i gzhung mang po gsan zhing / sku'i skye ba phyi ma dga' ldan du gshegs pa de'i slob ma