[A:29b]du brdzangs pas/ de rnams kyi nang nas lo chen rin chen bzang po dang / lo chung legs pa'i shes rab gnyis mkhas pa'i mthar phyin par gyur te/ bod la phan thog pa'i paNDi ta btsal bas/ bi kra ma shI la'i paNDi ta chen po dI paM kA ra shrI dznyA na'i yon tan gyi khyad par mtha' yas pa rnams gsan kyang / rang gis spyan 'dren pa ma spobs te tshur byon nas/ rgyal po la lo rgyus rgyas par zhus pas/ thugs mnyes shing the tshom yang chod par mdzad do/ /de'i tshe lo tsA ba rin chen bzang po'i drin gyis/ gsang sngags spyi dang / dkyil 'khor cho ga'i lag len sogs mnga' ris skor gsum du dar bar gyur kyang / rab tu byung ba 'ga' zhig tshul khrims kyi kun tu spyod pa dag pas so sor thar pa tsam gyis chog shes nas/ theg pa chen po byang chub sems dpa'i kun tu spyod pa la g.yel zhing / bye brag tu pha rol tu phyin pa la sgrub pa lhur len pa nyung ba nyid dang / sngon gyi log par rtog pa mtha' dag sel ba la paNDi ta chen po dI paM ka ra shrI dznyA na de nyid bod du spyan drangs na/ bstan pa skyon dang bral bar 'gyur ro snyam du chos rgyal nyid kyi thugs la dgongs nas 'bad pa chen pos/ lo tsA ba rgya brtson seng 'khor brgya tsam gser mang po dang bcas te rgya gar du btang yang / 'khor phal che ba tshad pas gum/ gser rnams kyang brlags nas/ jo bo spyan ma 'drongs/ dus der lha bla ma ye shes 'od gser 'tshol du byon pa/ gar log gi rgyal pos bzung bas/ de'i dbon po lha btsun byang chub 'od kyis khu bo bslu ba dang / a ti sha spyan 'dren pa la dka' spyad ji ltar mdzad pa'i tshul rnams lam yig las 'byung ba/ rnam