[A:3b]te/ bdag gi lhag pa'i bsam pa thugs su chad par mdzod la/ ri dwags kyi pags pa ral pa dang bcas pa 'di la zhabs mi 'jog gam/ lung mi ston na 'di nyid du lus skam par bya'o/ /zhes yid dam bcas pas/ ston pas zhabs bzhag te/ ma 'ongs pa'i dus su de bzhin gshegs pa shAkya thub pa zhes bya bar 'gyur ro zhes lung bstan pas nam mkha' la 'phags/ ting nge 'dzin brgya stong mngon du byas nas sa brgyad pa thob ste/ ji skad du/ sangs rgyas mar me mdzad la utpal lnga/ /gtor te ral pa stan du bting byas pas/ /mi skye'i chos la bzod pa thob gyur nas/ /shAkya'i rgyal por 'gyur zhes nga lung bstan/ /zhes pa dang / lung las/ gang tshe mar me mdzad kyi nga / /lung bstan gyur pa de yi tshe/ /sa brgyad pa ni thob gyur te/ /dbang bcu dag kyang thob par gyur/ /ces so/ /de na grangs med gcig tu tshogs bsags pas sa bcu rdzogs par gsungs pa/ 'dir don la gnas so zhes mkhas pa dag bzhed do/ /tshogs kyi ngo bo ni/ bsod nams dang ye shes te/ de yang pha rol tu phyin pa drug dang / bsdu ba'i dngos po bzhi dang ldan pa la sogs pa'i sgo nas 'jug bsog par mdzad pa ste/ rgyas par gzhan du blta'o/ /gsum pa sangs rgyas pa'i tshul ni/ de yang bram ze'i khyi'u bla ma las rim gyis tshe 'phos nas/ dga' ldan du lha'i bu dam pa tog dkar du gyur te dga' ldan gyi lha rnams la chos ston pa na/ sngon gyi dge ba'i mthus/ lha rnams kyis rol mo'i sgra las/ mar me mdzad kyi lung bstan dgongs par mdzad do/ /zhes sogs kyis bskul ba gsan pas/