[A:36b]thams cad khyod kyi sras su 'gyur/ /gangs can rgyud der bstan pa dar bar byed/ /der song chos kyi bya ba 'di ltar mdzod/ /rdo rje theg pa nang du dar bar mdzod/ /gzhung lugs rgya mtsho phyi ru dar bar mdzod/ /bslab gsum rnam dag rang rang dar bar mdzod/ /las can brtags shing bcud kyis smin par mdzod/ /tshig gi spros pa mtha' nas chod par mdzod/ /shes rab rtogs pa nang nas rgyas par mdzod/ /'phrin las bzang po phyogs mthar khyab par mdzod/ /gdul bya yongs la phyogs ris med par mdzod/ /sgo gsum thub pa chen po brtan par mdzod/ /gnyen po mi g.yo mgon po tshugs par mdzod/ /'gro drug thugs rje chen por brtse bar mdzod/ /'gro ba'i sdug bsngal thams cad sgrol bar mdzod/ /bslab pa gsum gyis nyin mtshan phyug par mdzod/ /lha chos bdun gyi 'byor bas phyug pa'i tshe/ /gsang sngags lhun gyis grub par mchis 'o ang / /zhes gsungs pa la/ de ltar bla ma dang yi dam rnams kyis bod kha ba can du 'byon par lung bstan pa na yang / a ti sha rang nyid bstan pa'i bya ba la gzhi ches pa dang / gnas brtan ratna a ka ra la sogs pa/ jo bo bod du byon pa la mi dga' ba rnams kyis tshor dogs pa dang / rdo rje gdan gyi rgyal po la sogs pa mi re re tsam gyis bshol btab pas/ gtsug lag khang mchod cing yam yom du lus pa na/ lan cig jo bo rdo rje gdan du byon pa'i rjes su lo tsA ba gnyis kyis byon nas/ zhabs la gtugs te gdong mchi mas gang bzhin du gsol ba yang yang btab pas/ jo bos kyang bod du