[A:4b]chu klung nye'i ranydza na'i 'gram du lo drug tu dka' ba spyad pa'i mdzad pa/ byang chub snying po rdo rje gdan du gshegs pa'i mdzad pa dang / lo sum cu rtsa lnga bzhes pa sa mo phag gi lo dpyid zla tha chung sa ga zla ba'i yar ngo tshes bco lnga'i srod la lha'i bu'i bdud bcom pa'i mdzad pa/ tho rangs mngon par sangs rgyas pa'i mdzad pa'o/ /de nas dam pa'i chos kyi che ba byung ba'i phyir/ sangs rgyas stong po thams cad la chos kyi 'khor lo bskor bar bskul ba po mi brjed kyi bdag po lha tshangs pas gser gyi 'khor lo rtsibs stong dang ldan pa phul nas gsol ba btab kyang zhag bdun phrag bdun du chos ma gsungs par/ bdun phrag tha ma la wa ra na sir dbyar zla 'bring po chu stod zla ba'i yang ngo'i tshes bzhi la/ lnga sde bzang po la bden bzhi'i chos kyi 'khor lo bskor ba'i mdzad pa bstan to/ /de nas sku dngos kyi gdul bya rnams la chos kyi 'khor lo rim gyis bskor nas smin par mdzad de/ shing pho spre'u'i lo la mya ngan las 'da' ba'i mdzad pa bstan par bzhed do/ /de yang ston pa'i 'khrungs lo sogs la bzhed tshul mi 'dra ba cung zad yod kyang / 'di jo bo rje'i bzhed pa ltar yin la/ chos rje sa skya pa ni/ me mo yos la lhums su zhugs/ sa pho 'brug la bltams/ chu pho stag la sangs rgyas/ me mo phag la gshegs par bzhed/ dus 'khor las/ me pho rta'i lo la lhums su zhugs par bzhed do/ /de yang ka ma la shi las/ thub pa'i mdzad pa bsam gyis mi khyab kyang / gtso bo dang grangs la dga' ba rjes su bzung ba'i phyir mdzad pa bcu gnyis