[A:297]'di dag shes pa zhig cis kyang gyis shig /mkhas par gyur pa'i tshe nged la chos rjes pa'i dgongs pa skong dgos kyi 'gyur 'dra yang dgos pa yod de rjes su byed do gsungs nas/ de dag gi dpe dang gser srang lnga/ dar yug bcu rnams gnang byung ste/ rten 'brel yod pas do nub rje btsun gong ma'i gzims khang dpe khang du nyol la song / slar 'khor ba na shog cig gsungs nas brdzangs so/ /
shong gi thugs la skyes stobs kyi blo gros ni phun sum tshogs/ sbyor byung gi nan tan mchog tu gyur na legs bshad gsar pa mang du bsgyur ba cis mi nus snyam du dgongs te 'phags pa'i gzims g.yog pa mdo smad pa blo gros rgyal po dang 'grogs nas bal yul du byon te/ paNDi ta sa dbang bzang po'i drung du sgra snyan ngag sdeb sbyor zlos gar mngon brjod la byang bar mdzad nas sa skyar byon/ 'phags pa rin po che'i drung du phebs/ shin tu dgyes par gyur/ nged kyi chos rje pa byang phyogs sprul pa'i sder sku'i bkod pa bsdu ba'i tshe/ tha ma'i gsung du bka' stsal pa la/ da ni sangs rgyas kyi bstan pa yang mchog tu dar bar byas/ brgal brtags kyi sgo nas gtan la 'bebs pa'i srol bzang po dod/ tha snyad rig gnas kyi tshul 'di la yang lag rjes chen po byung bas sems la 'phreng ba cher med/ 'on kyang 'phags pa bsnyen par ma rdzogs pa dang / rtogs brjod dpag bsam 'khri shing ma 'gyur ba dang / dus kyi 'khor lo'i rgyud phreng 'dzin gyi tshigs bcad bzhin ma 'gyur ba gsum tsam mo/ /zhes gsungs pa zhig yod na'ang bsnyen par rdzogs zin/ 'gyur gnyis sngar ma byung bas da khyed kyis gyis shig /de'i grogs dpon chen shAkya bzang pos kyang byed pa yod do/ /zhes dgyes bzhin bka' stsal bas/ sa skyar dus 'khor rgyud