[B:68b] bzhugs par bzhed pa dang / chos kyi rje spyan snga tshes gnyis rin po che'i zhal snga nas 'di phyogs su phebs na mi dgyes pa med pa'i skabs shig na/ da ni gnas gzhan zhig btsal ba 'thad par 'dug pa'i rgyu mtshan yang thor re ba zhig gsung / sku nyams kyang ngan zhing mdzad pa gang la'ang stabs ma bde bar byung nas/ slob dpon smon lam pa khyod song la/ spyan snga rin po che'i drung du bdag byang phyogs su 'ong bar 'dod pa'i rgyu mtshan phul/ bzhed pa dang mi 'byor ba mi 'dug na dus tshigs thag chod la shog bdag la 'thog ci yang med/ bya ba 'di ma grub kyi bar du gzhan su la'ang ma smra/ 'dir yang ngas smra bar med gsung bas/ chos kyi rje spyan snga tshes gnyis rin po che'i zhabs drung du de ltar phul bas/ bzhed pa dang shin du 'byor nas de'i sang nyin chibs pa rjes bzhin du 'ong ba byas nas/ slar sku mdun du 'ongs te sang rang la dus gnang yod zhus pas dgyes ches te/ de'i mtshan mo shin du snga bar bzhengs nas ja yang yang skol kyang nam ma langs thugs dang ma 'grigs par snga mor phebs/ nam za zi'i skabs su mchod rten [A:162]chen mo la phyag nas mdzad/ chibs thog tu 'thon te byang khar phebs/ chos rje spyan snga tshes gnyis rin po che sku 'khor mang po dang bcas pas gru khar bsu ba legs par gnang / klu khang du zhag kha yar bzhugs/ de'i skabs su byang chub mchog tu thugs bskyed pa mngon chung gis gsan/ de rjes smon ldang mkhar du bzhugs nas sgron gsal gyi 'grel pa le'u bcu pa yan mdzad/ de nas spyan snga tshes gnyis rin po che'i drung du gsung chos mang du 'bul dgos pa'i bka' lung nan du phebs pas/ zla ba brgyad pa'i bsham du brag khar phebs/ nang sor mi phebs pa'i dam bca' grol brtag gnyis kyi rgyud rngog pa'i rin chen rgyan 'dra'i steng nas bshad pa legs par phul te/ 'di la bka' rgyud gcig pa'i rten 'brel dang byin brlabs yod gsung / de nas rgyud gsum gsang ba'i bshad pa sngon du 'gro ba'i dpal dus kyi 'khor lo'i rgyud 'grel gyi bshad pa