[A:126]rab/ gnyan chung dar ma grags/ cog ro chos mchog mar pa do pa/ lho brag mar pa lo tsA/ pa tshab nyi ma grags/ rma ban chos 'bar/ rwa lo/ cal lo/ sa lo kun dga' rgyal mtshan/ khro lo byams pa dpal la sogs pa/ rgya bod gyi lo tsA ba mkhas pa mang pos/ sngags mtshan nyid/ bka' bstan bcos dpag tu med pa bsgyur/ bstan pa ches cher gsal bar mdzad pas/ bka' drin shin tu nas kyang che'o/ khyad par gyis kyang mnga' bdag rtse lde'i sku tshe'i smad la/ khro lo byams pa'i dpal rgya gar nas paNDi ta spyan 'dren du btang bas/ kha che'i paN chen shAkya shrI zhes pa de nyid/ dgung lo brgyad cu rtsa lnga bzhes na'ang / yi dam kyi lung bstan byung bas/ me pho rta lo la gdan drongs/ bod yul du lo bcu gnyis bzhugs/ sa khro lcal gsum la sogs slob ma mkhas pa mang du spel/ gtsang so ba tshul khrims mdzes dang / rdor byang rnam gnyis la sogs pa'i slob ma bskos nas/ bstan pa'i srol btsugs/ bod kyi spyi mchod tshogs pa sde bzhir grags pa'i/ bstan pa'i rgyun chu bo'i gzhung ltar gsal ba 'di nyid mdzad cing / dgu bcu rtsa bdun pa la rgya gar la bzhud/ go dgu bzhes pa me yos la chos dbyings su gshegs par gda'o/ /mnga' bdag rtse lde'i sras/ bha lde/ de nas rim pa bzhin/ lde bha lde/ na ga lde pa rnams byon/ 'di yan chod la gu ge spu rangs/ mar yul la sogs pa'i btsan po rnams chad par 'dod cing / dpal 'khor btsan man chad 'di la/ sngon rabs kyi yig tshang dang mi mthun pa 'ga' re snang ngo / /na ga lde'i sras btsan phyug lde ya rtser byon/ de'i sras bkra shis lde/ de'i sras bkra btsan lde/ de'i sras grags pa ldes/ gser phye bre bcu bdun la/