[A:159]dpal ldan sa skya 'khon gyi gdung rabs bzhugs so/ /bla ma dang mgon po 'jam pa'i dbyangs la gus pas phyag 'tshal lo/ /rgyal ba kun gyi mkhyen rab mtha' yas pa/ /gcig tu bsdus nas sna mang gdul bya la/ /sna tshogs sprul pa'i thabs kyis don mdzad pa'i/ /'khon ston rim par byon pa'i zhabs la 'dud/ /dri med gdung rgyud rim par byon pa dang / /de'i mdzad pa ngo mtshar mtha' yas pas/ /thub bstan gsal dang 'gro kun smin grol tshul/ /rnam thar ngo mchar phreng ba bdag gis spel/ /bdag cag gi ston pa thub pa'i rgyal tshab dam pa/ 'khon gyi gdung rgyud rin po de nyid/ thog mar 'od gsal gyi lha las babs par bzhed de/ dang po sa gtsang gnas mtho ba/ la stod mnga' ris kyi sa char gnam nas/ lha mched gsum byon pa'i che ba gnam lha spyi ring / bar pa gnam lha g.yu ring / chung ba gnam lha dbu se bya ba byon/ de rnams la mi'i rje zhus pas/ chung ba de mi yul du bzhugs nas/ mi'i rje mdzad/de la sras bzhi byung ba/ sa ji li spun bzhir grags so/ /de dag gis ldong rus chen bco brgyad dang 'thab/ de'i grogs la gnam lha g.yu ring gis byon nas/ ldong rus chen bco brgyad po btul nas/ bran du byas skad do/ /'o na gdung rgyun 'di gang nas 'ded na/ gnam lha g.yu ring gis dmu'i bu mo/ dmu bza' ldem bu khab tu bzhes pa la/ sras bdun byung ba la/ ma sang spun bdun du grags so/ /