[A:172]bzhes pa la/ rigs kyi sras pho bzhi dang / sras mo bzhi 'khrungs pa'i thog mar/ ma cig kun skyid la sras gnyis kyi che ba/ bla ma 'phags pa blo gros rgyal mtshan dpal bzang po ba/ yab dgung lo nga gnyis pa'i dus/ shing mo lug lo zla ba gsum pa'i tshes drug la sku 'khrungs/ 'di nyid ni dang po nyid nas sbyangs pa dang / skyes stobs kyi shes rab dpag tu med pa mnga' bas/ gzhon nu nyid nas slob gnyer gsan sbyong mdzad pas/ gang la'ang mthong ba tsam gyis mkhyen pa kho na byung / thams cad kyis 'di lta bu khyad 'phags zer/ mtshan yang 'phaT pa zhes su grags pa yin la/ dgung lo bcu pa'i dus su/ chos rje sa paN gyi phyag phyir byang ngos la byon pa'i lam du zul phur chos rjes mkhan po dang / zul phu mkhan chen chos kyi byang chub pas/ slob dpon mdzad nas rab tu byung / byang ngos sprul pa sder/ /khu dbon pa phebs dus/ se chen rgyal po'i lung gis byang ngos na/ sa skya bla ma bya ba khyad 'phags sleb yod 'dug pa/ nged kyi bla mchod byed dgos gsungs pa byung nas/ chos rje pa sku nas bgres pas ma byon/ bla ma 'phags pas rgya nag tu byon/ se chen rgyal po dang mjal bas shin tu mnyes te/ hor gyi rta pa brgya skor gcig byang ngos la phyin nas sa skya pa dang yon mchod du 'brel/ bla ma'i brtag pa mdzad rin dang / byang ngos su chos rje pa bde bar gshegs pa'i dgongs pa rdzogs thabs sgrub pa la sogs pa rgya hor gyi yul du/ lo mang bar bzhugs/ dgung lo nyer gcig pa shing mo yos lo zla ba lnga pa'i tshes bcu'i nyin/ rgya yul gyi he tse hu dang nye ba'i sar/ phywa pa chos kyi seng ges thog drangs pa'i mkhan slob gsang ston dad dge la sogs pa bzang la mang ba'i dbus su