[A:173]bsnyen par rdzogs par mdzad/ de nas pho brang ta'i tur byon nas/ se chen rgyal po yab yum sras bcas la/ rgyud gsum gyi dbang mo che bskur/ ti shri'i mtshan gsol/ dbus gtsang gi khri skor bcu gsum dang / dbang yon bsam gyis mi khyab pa phul/ hor sa skya pa yon mchod du 'brel/ bod yul go pe le'i mnga' 'og tu tshud pa'i snyan grags brjod pa dang / 'ja' mo 'dzugs pa la mi chen das sman bya ba sa skya man la mngags/ se chen gyis gser yig pa bod la btang ba'i sngon ma de yin/ de'i phyi lo me pho 'brug la bla ma dbus gtsang du phebs/ lo de la dpon chen shAkya bzang pos/ lha khang chen mo'i 'gram gzhi bting / de nas da lta shing pho stag lo srog sme brgyad dkar dbus na yod pa 'di yan la/ lo brgya dang brgyad cu gya gcig song 'dug sa skya'i 'gram 'ding ba dang lha khang gi bar na lo brgya dang brgyad cu yod par 'dug de rting yang bla ma 'di gong du byon/ rgyal po yab yum sras bcas la dbang bskur ba'i dbang yon bar ma la bod chol kha gsum po phul/ gsum pa la rgya'i yur ma chen mo phul nas bcad/ bsngo bas rgyas btab zer ba 'dug cing / che ba'i yon tan mtha' yas mnga' bas/ bstan pa dang 'gro ba'i don rgya chen po mdzad tshul rgyas pa rnam thar chen mo na gsal lo/ /bla ma 'dis gdan sa lo so drug mdzad/ dgung lo zhe drug lcags pho 'brug lo smal zla ba'i tshes nyer gnyis kyi snga gro nyi ma me bzhi 'phrad pa'i tshe/ dkon mchog la mchod pa shoms gsungs/ skyil mo krung mdzad/ rdo rje dril bu thugs kar snol nas/ rtse gcig tu bzhugs pa'i ngang la ngo mtshar ba'i ltas du ma dang bcas te/ dpal ldan sa skya'i lha khang bla brang du bde bar gshegs so/ /