[A:206]po'i bstan jus yar 'phel gyis mdzad 'phrin rgya che bar mdzad/ gcung po ta'i si tu bsod nams dpal bas/ rdzong rtse chen bzung / phyi nang du/ dgra zun gyi blang dor/ sde gzar ci rigs pa dgos pa byung na'ang / ma sangs kyi sprul pa/ thabs la mkhas pa'i skyes bu dpa' mdzangs 'joms 'dug pas/ mthar thug dgra gnyen blang dor ma nor pa'i 'dul sbyongs/ sa skya pa'i zhabs tog spyi jus su che ba dang / ma las bu dga' ba'i rdzong bzhi/ shab seng ge rtse/ sde chen rtse/ 'jad/ bo dong la sogs pa'i mnga' zhabs gsar 'phel rim par chod cing / rgya'i ta'i ming rgyal pos/ tu si'i mtshan/ dngul dam lung bzang po dang bcas pa gnang nas/ dpal ldan sa skya pas thog drangs/ gtsang srid spyi dgos kyis bstan pa'i srog shing lta bur bzhugs pa 'di lags so/ /de'i sras che ba dpon po rgya mtsho pa/ sku na gzhon rab la sku gshegs/ gcung po dbon po rin chen 'phags pa la/ ta'i ming rgyal pos/ su si'i las ka gnang zhing / sde srid 'dzin skyong gis phra rags thams cad yab las mi zhan pa byung ba'i/ snyan grags yar 'phel du bzhugs so/ /'phags pa rin po che'i sras che ba/ rtse chen chos rje pa mdo rgyud kyis dgongs pa rnams thugs su chud ste/rnal 'byor gyis dbang phyug chen po de nyid kyis 'gro ba'i 'dren pa la sku brtan par bzhugs so/ /de'i gcung po rgyal chen pa/ yang dpon po shAkya dpal ba dang / chen po dbang rgyal bas/ sa skya nang chen bzung / nang ltar gyis mthun sbyor mdzad pa dang / mi mthun phyogs rnams kyis spyi thogs su/ ri bo ltar brjid pa zhig byon par gda'o/ /yang ma sangs dar po'i sras/ a chen bzang po