[A:224]zhol bsrung ba gang khag pa thams cad du phebs nas/ sgyogs mda' rdo'i gnad sprad pas shin tu ngo mtshar du gyur te/ phyis nas gdong len gyi mi su yang med pa byung ngo / /gzhan yang dmag che chung mtha' rogs snga phyi mang po'i 'go ma la byon pa/ dus nam yang gdong phud ngor lang kho na mdzad cing / phyi skor bya ba gang la'ang / brtan lhing gtso bor 'don pas/ phyi nang kun gyis 'di ni dpa' mdzangs 'dzoms pa'i skyes bu chen po yin zhes grags so/ /de'i gcung po rgya bzang rin chen/ rgya mtsho rin chen/ nor bu rin chen/ grub pa rin chen rnams yin/ gcung 'di'i rdzong rang 'byon rtse bzung / mtshar zhan bod 'brog kun gsar du chod do/ /gcen gyi khab tu gdung rgyud lcam mo/ byang sems nam mkha' rgyal po ba byon pa'i sras che ba chos rgyal rin chen mched gsum te/ sku mched khu dbon zhal ngo mang la hrags pa/ sku brtan par bzhugs pa lags so/ /blon chen che rgyud ma sangs sprul pa'i rigs/ kha drag mi dpung 'dzoms pa 'khor bcas 'dis/ /phas rgol mi mthun phyogs las rgyal ba dang / /dpal 'byor yar ngo'i zla ltar rgyas gyur cig /dge legs 'phel bar gyur cig /pho rtsal sna dgu ni mtheb kyi sha non pa dang gcig rkyal gyis chu non pa/ yang sor bya lta bu dang gsum la dpa' shed lus kyi rtsal gsum zer/ lo rgyus kyi dge yon thon pa dang / 'gran shags kyi lce non pa dang / khyom tshos bzhad gad thon pa dang gsum la smra ba ngag gi rtsal gsum zer/ dpa' la brtan tshugs pa dang gcig mdzangs la blo myur ba dang gnyis/ go gsal la gting sus kyang mi rtogs pa dag gsum la/ blo gros sems kyi rtsal gsum zer/ pho rtsal sna dgu ni/ mda' rdo mchongs gsum/ sho phras rtsis gsum/ bang shags rkyal gsum dang dgu'o/ /pho rtsal sna dgu 'di 'dzom na ma sangs sprul par byed do/ //