[A:262]bstan nas/ sgam por byon/ mkhyen rtogs dang thugs rje mdzad pa'i rnam thar dpag yas mnga' ba de/ dgung lo lnga bcu rtsa bzhi pa/ glang lo dbyug pa zla ba'i tshes nyi shu la mya ngan las 'das so/ /de'i slob ma grub thob dbu se/ zhang rin po che/ zhang ston ka lo ka dung ston la sogs mang du byon/ bde gshegs khams pa rdor rgyal gyi gdung rus ni/ rme 'dor ba'i nang tshan dbas/ de'i nang tshan dbe na/ yab dbe na a dar gyi sras su/ me pho rta lo la/ mdo khams yor khrims su 'khrungs/ ldong yan byang chub kyi bu/ tshul khrims la rab tu byung / u ring rgyal 'bar la chos gsan/ nyi shu rtsa lnga lon pa la dbus su phebs/ zul phur bya 'dul ba 'dzin pa'i drung du bsnyen rdzogs mdzad/ dge bshes g.yor gnyan/ dbar tsang bu kha pa/ byang sems dpa'i dam pa snyal chung ba/ bla ma 'dzim/ 'khon sa skya pa chen po/ nyang sgo mkhan po/ byang sems zla ba rgyal mtshan/ bla ma brag dkar po ba la sogs/ sngags mtshan nyid kyi bka' lung gdams pa rnams zhus/ dgung lo bzhi bcu rtsa gnyis pa/ dge bshes zhang sum thog pa dang 'grogs nas/ sgam por byon nas/ mnyam med dwags po lha rje dang mjal/ rtogs pa 'khrungs/ lo ngo gsum bsten/ yar byon tsha rang btsan po'i sbyin bdag mdzad nas/ lcags pho khyi lo la/ phag mo grur 'jag spyil dgon pa btab/ chos khrims bcas/ dgung lo lnga bcu rtsa lnga nas 'gro don bskyangs/ drug cu re gcig pa me mo phag ston zla tha chung gi nyi shu lnga la phag mo gru'i mthar tsar mya ngan las 'das so/ /de'i thugs kyi sras yin te/ bsod nams mthar phyin 'bri khung pa/ mos gus mthar phyin stag lung pa/ shes rab mthar phyin par bu ba/ rtogs pa mthar phyin sna bu ba rnams so/ /nye ba'i sras bzhi ni/