[A:289]po'o/ /bar bskal ces pa ni/ mi lo ther 'bum bcu la ther 'bum chen po gcig yong ba/ de la bar bskal gcig zer te/ de 'dra ba nyi shu'i yun la snod bcud 'jig nyi shu'i yun la stong / nyi shu'i yun du chags/ nyi shu'i yun du gnas pa/ bar bskal brgyad cu po de rdzogs pa la/ bskal ba chen po gcig zer ro/ /dang por chags pa la bar bskal gcig 'gro ba'i tshad ni/ rlung gi dkyil 'khor brtsams pa nas/ dmyal ba mnar med du sems can gcig skyes pa'i bar de yin cing / 'jig pa'i 'go brtsams pa nas/ mnar med du sems can gcig kyang med pa'i dus de'ang / bar bskal gcig yin no/ /snod 'jig pa'i tshe mes 'jig pa dang / chus 'jig pa dang / rlung gis 'jig pa dag gsum las/ mthar rlung gis 'jig pa'i dus su/ bsam gtan gsum pa'i gnas man 'jig te/ rlung chen pos ri rab kyang gtor nas yang du stong la/ gzhan rnams lta smos kyang ci dgos/ de ltar du thams cad zhig tshar ba'i rjes la/ phyogs bcu'i rlung 'dus nas/ sra zhing brtan pa'i dkyil 'khor chags pa la brten nas/ chu'i dkyil 'khor dang / gser gyi sa gzhi la sogs snod kyi 'jig rten dang / bcud kyi sems can sngon ma ltar yar mar/ rim pa bzhin legs par chags so/ /chos rgyal 'phags pas mdo rgyud mtha' dag gis/ khyad par 'phags pa'i don bsdus bstan bcos ming / /shes bya rab gsal grags pa'i nyi ma yis/ /bdag blo'i mun pa bsal phyir snod bcud kyi/ /chags 'jig khams sum dbye ba mdor bsdus 'dis/ /dge bas 'gro rnams kun mkhyen thob par shog/ //