[A:37]bstan pa'i gnas tshad/ thub pa'i bstan pa gnas tshad la/ mdo sde bskal bzang las/ dam pa'i chos ni lo lnga brgya dang gzugs brnyan lnga brgya ste/ lo stong du gnas zer ba dang /mdo rgyud mang po nas lo grangs mi gcig pa du ma zhig bshad na'ang / de rnams ni drang don dgongs pa can re yin la/ 'bum TIka 'grel pa gnod 'joms nas bshad pa 'di ni sgra ji bzhin pa yin par mkhas pa rnams bzhed do/ /de ci'i phyir zhe na/ 'bum TIka nas bstan pa lo lnga stong du gnas pa/ lnga brgya phrag bcur phye bas le'u bcu tham par 'gyur la/ le'u dang po la dgra bcom pa'i le'u/ gnyis pa la phyir mi 'ongs pa'i le'u/ gsum pa la rgyun du zhugs pa'i le'u rnams la khongs du chud pa'i le'u gsum zhes bya'o/ /bzhi pa lhag mthong gi le'u/lnga pa ting nge 'dzin gyi le'u/ drug pa tshul khrims gyi le'u rnams la sgrub pa'i le'u gsum zer/ bdun pa mngon pa/ brgyad pa mdo sde/ dgu pa 'dul ba'i le'u rnams la lung gi le'u gsum zer/ lnga brgya ba phrag bcu pa la rab tu byung ba'i rtags tsam las/ lta spyod rnal ma dag mi ldan pas/ rtags tsam 'dzin pa'i le'u ste/ 'di la lnga brgya tha ma zhes bya'o/ /bstan pa lo lnga stong du gnas rgyu'i steng nas/ sngar ji tsam 'das/ da lo grangs ji tsam gnas ni/ 'di thog nas zhib tu brtsi'o/ / / /