[A:55]byas pa yan la lo nyis brgya lnga bcu rtsa bzhi song zhing / rgyal po sa la nu dang / blon po yakSha ni li'i rgyal blon gyi thog ma'o/ /de nas sa la nu'i bu/ rgyal po ji dza ya sam bha wa byung ba/ rgyal sar zhugs nas lo lnga song ba dang / li yul du chos kyi thog ma byung ste/ de yang byams pa rgyal po dza ya dang / 'jam dpal dang 'phags pa bai ro tsa nar sprul nas/ sngon la phyugs rdzi byas pa la/ skad dang yi ge bslabs/ de nas dam chos dbu brnyes rim par byung ngo / /rgyal po des tsar ma'i gtsug lag khang bzhengs/ de'i nang na klu rgyal hu lor gyis kha che nas nam mkha' la spyan drangs pa'i mchod rten byin rlabs can yang bzhugs la/ li yul du gtsug lag khang dang / mchod rten gyi thog ma'o/ /de nas rgyal rabs bdun gyi bar la/ gtsug lag khang mang du brtsigs so/ /byams pa rgyal po bi dza ya birya zhes par sprul nas/ bstan pa'i bya ba rgya cher byas shing / ghung tir gyi gtsug lag khang bzhengs/ mchod rten gong ma sa la ghandha'i bsngags pa brjod pas/ rgyal po dad de/ glang mgo ri'i steng du/ gyi'u shan gyi gtsug lag khang bzhengs so/ /de nas rgyal rabs gnyis kyi bar la gtsug lag khang mang po brtsigs/ de rting rgyal po bi dza ya dzas/ ma zha'i mchod rten dang gtsug lag khang bzhengs so/ /rgyal po de la sras gsum byung ba'i che ba 'don 'gros/ bar pa dar ma nan tir gnyis/ rgya gar du chos slob pa la byon/ chung ba bi dza ya dar mas rgyal srid bzung / dpa' rtsal che zhing gsod pa la skye na pas sdig che/ phu bo dar ma nan tir gyis dgra bcom pa thob nas/ thabs kyi bdud btul/ sdig bshags byed du bcug te/ dro ldir gyi gshongs na/ sngon thub pa chen pos rgyal