[A:78]pa yin/ ye sang dkar po gnam kyi 'ju thag can dang gcig ye mon nag po khro chu'i pha bong 'dra ba dang gnyis/ spyang phrug ye shes lha'i sgron me dang gsum/ mon rdzu nag po khyi'i rnga ljang can dang bzhi'o/ /mi de rnams mang du 'phel nas bod la dbang byas te/ de dus gdong dmar can gyi yul zhes par grags shing / ma sang spun dgu rgyal phran nyi shu rtsa lnga/ rgyal phran bcu gnyis/ rgyal phran sil ma bzhi bcus rim par dbang byas skad/ mkhan rjes dbang mdzad/ de nas dmu rje btsan pas bdud po ma TaM ru tra/ srin po yakSha de ba/ klu rgyal gang ba rnams kyi rim par dbang byas so/ /de'i skabs su 'phags pa spyan ras gzigs dbang phyug thugs rje chen po dang ldan pa de/ bcom ldan 'das snang ba mtha' yas dang / bstan pa'i bdag po rgyal ba shAkya thub pa'i bkas bskul zhing / ri bo po ta la'i rtse nas byang la zhal gzigs te/ kha ba can gyi sems can rnams 'dren par dgongs te/ nyin mtshan dus drug tu gzigs pas/ kha ba can 'di ni 'dzam bu gling du/ yul gru chen po lnga'am dgu yod pa'i nang nas/ ngan shos su'ang 'dug cing / sangs rgyas kyis zhabs kyi ma bcags/ gsung gi 'od zer gyis ma khyab/ bstan pa'ang med/ gdul byar ma gyur pa mun pa mun nag lta bur 'dug pa la/ stod khams gsum ni gangs dang g.ya'i ra ba/ rdzing 'dra ba na/ sha dgo ri dwags kyis dbang byed/ bar khams brag dang spang gi bskor ba/ yur ba 'dra ba na/ spre'u dang brag srin mos dbang byed/ smad khams gsum nags kyi rdzing 'dra ba na/ glang po che dang / 'dab chags la sogs pas dbang byed/ mi'i 'gro ba med par 'dul ba'i skabs ma rnyed pa dang / kha ba can gyi rgyal khams