[A:341]bcas pa mjal/ dpal rab nas phebs bsu'i bkod pa gzab pa dang bcas te der phebs/ dpon sa nyid gtso bor gyur pa'i spyi sger thun mong dang so sor chos bka' rgya cher gnang / khyad par dpon sa sras yum nas gsol ba nan can btab ngor zab chos kyang 'ga' zhig bstsal/ zhal gyi rjes gnang mdzad tshe/ sras mo chos mdzad ma gcig yod pa a tsa ra lag na rkyal pa khyer ba sma ra ring po byas pa zhig dang dngos su 'phrad pas thams cad kyis bla ma dang mgon po dbyer med du shes pa'i dad pa thob/ dpal rab steng gi mgon khang bsil ba'i tshal du grags pa der nyin re bzhin thugs dam bskang 'phrin re dang / zhal gyi man ngag nas 'byung ba bzhin zhal gyi rten rdo zhig gi steng du nas nag gi tshom bu lnga la brten nas bstan 'gro spyii'i phan bde dang khyad par rje btsun sa skya pa'i bstan pa phyogs mthar rgyas pa'i bka' bsgo gnang bas phyis su sgar chen rin po che'i phyag tu dpal rab kyi chos gzhis byung ba sogs kyang 'di'i nus par nges shing de ras kyang sbyin bdag 'khor bcas dad stobs phul du phyin pas 'bul nod kyang bsam gyis mi khyab pa byung / de nas rim gyis zla ba dgu pa'i nang gdan sar phebs/ zla bcu pa dang bcu gcig par lo ltar gyi dus rim rnams rgyas par tshugs/