[A:109]phrin rgya che ba kun gsal gyi gru ltar yangs shing rgya che ba'i nang nas cha shas tsam smos pa ni/ rnam thar bsdus pa las/ 'chad la 'jam pa'i dbyangs kyi spobs pa rdzogs/ /rtsod na phas rgol 'joms pa'i gnam lcags thog//rtsom pa mkhas pa'i yid 'phrog thugs rje'i gter/ /mkhas pa'i bya ba gzhol la/ zhes sogs gsungs pa dang / yang gang tshe gdul bya rjes su 'dzin pa'i tshe/ /gzigs pa tsam gyi tshig don thugs tshud de/ /gsung lam kho nas skal ldan nyin mtshan kun/ /bar med chos 'khor bskor la/ zhes gsungs pa ltar/ lcags sprel gser khri rin po cher mnga' gsol grub nas rim gyis/ rje rdo rje 'chang gi bsti gnas gsar pa byang mar gong 'khod kyi zhal ngo sogs bka' chos rin po che zhu mi rnams kyi steng / phyag gnyer mgron gnyer sogs 'ga' zhig 'phar ba'i nyi shu skor la sa lo'i yig steng nas 'jam dbyangs dmar ser gyi rjes gnang stsol skabs/ yab rje rdo rje 'chang nyid kyis thog steng nas ci 'dra byung 'gro dgongs te gzigs pas/ grub 'phral rje rdo rje 'chang nyid la de ltar gnang tshul rnams sgo gang sa nas legs par 'dug ces dbugs dbyung gzeng bstod kyang bstsal to/ /de nas rim gyis lo nang der 'brum nad dang 'bur yan gnyis char byung ste byings kyis dbye dka' ba'i dogs gnas che skabs/ yab rje mchog tu mdzod 'dzin rgyal mtshan rin chen nas gnas tshul yang yang zhu gnang gis phyir phebs su/ 'brum pa min tshul kho na byon pa ni/ gzhan ngo srung