[A:13]gsungs pa ltar/ gang gi yum mchog nyid la lhums zhugs kyi gzigs snang dang mnal lam ngo mtshar can rgyal sras sa bcu la gnas pa'i byang sems chen po rnams dang dbyer ma mchis pa byung tshul ni/ dgung grangs gsum pa yan gyi rnam thar lo rgyus phal cher gdung rabs chen mo zhal skong rnam thar du gsungs pa bzhin no//
'on kyang sku bltams pa'i tshul sogs cung zad brjod na/ de yang 'di ltar thos te/ thog mar 'od gsal lha las chad pas na lha dang / srin po 'khon pa'i bar du byung bas na 'khon/ mthar mar gnas gzhi'i mtshan las sa skya par grags pa'i mtshan mchog gsum ldan gyi gdung rigs yab rje bdag chen ngag dbang bsod nams rin chen zhes sems dpa' chen po de nyid dang sngon dus gsang sngags rnying ma'i grub thob rje 'bangs nyer lngar grags pa'i nang tshan/ dkon mchog 'byung gnas thog chen mda' 'phen/ zhes grags pa'i lang gro dkon mchog 'byung gnas kyi rigs rgyud ko cag 'gro mgon ma'i yum mchog mkha' 'gro'i mtshan rtags dang ldan pa/ bsod nams dpal gyi dbang mo de nyid kyi sras su zhi ba zhes pa sa mo bya yi lo/ dus der rgyal mchog bdun pa chen po bskal bzang rgya mtsho dgung grangs nyer gcig phebs pa dang / paN chen blo bzang ye shes bcas kyi sku thog dang / ljongs 'dir dbus gtsang zin bun gyi nang 'khrug lo gcig tsam byung rjes/ gtsang pa rgyal te mi dbang pho lha bsod nams stobs rgyal bod khams yongs