[A:343]dbang bde bar gshegs/ de nas drug cu pa'i zor 'dzin sngon 'gro'i ljags bsnyen zla gang mar thugs gzhol te/ zor 'phen sogs lugs 'gro gnad smin du bka' drin bskyangs shing / mgo zla'i nang bas se phyag rdor skyabs kyi bsngo 'bul ba sog po rnams la lugs zung bdag rkyen yang dag dang sbrags/ lcang skya rdo rje 'chang nas gsung bris rten ldan gyi bka' lan dus gsum gnas tshul las 'phros pa'i bka' gsang rmad du byung ba'ang legs par gdams shing / zla mjug nas lha mchog rdo rje gzhon nu'i ljags bsnyen zla gsum mar thugs gzhol ba'i skabs so/ /rnam thar bsdus pa las/ dbang lung man ngag rjes gnang 'khrid kun kyang / /bka' babs phyag bzhengs ngo sprod la sogs pa/ /ma 'dres so sor spyod pa'i shes rab kyis/ /gdul bya'i blo gros spel la gsol ba 'debs/ /zhes gsungs pa ltar/ rje 'di snyigs dus kyi rgyal ba gnyis pa 'jam dbyangs mi'i zol can mngon sum yin pa'i gtan tshigs kyang kun dang mthun grub tu/ 'di lta ste/ nyin mtshan bar med du chos 'khor ji snyed bskor ba'i tshe'ang / gzhan dag ni yun ring du dpe sbyongs sngon 'gro'i sgo nas chos 'chad la 'jug kyang / rje 'di ni gsung ngag slob bshad kyis mtshon dbang 'khrid rje gnang kun dpe 'di dang 'di lta bu'i thog nas yin no zhes 'doms par mtshon byed dpe spyan lam du phab tsam las gzigs yul ye mi dgos shing / phyag len rnam dag gi rgyun ma nyams pa gsung lam kho na nas shar mar gsung rgyun phyag len