[A:368]rar grags pa 'di lta bu gzigs te lung bstan du ma brnyes pa yin te/ nyid kyi gsung las kyang / mgon po'i lho nub mtshams nas gdan drangs pa'i/ zhes dang / gzhan yang thugs dam 'od gsal sogs su lung bstan sngon gnas rjes dran gyi sku skye du mar zhal gyis bzhes pa yin te/ nyid mdzad rnam thar zhal gsung ma las/ phyogs bcu dus gsum rgyal ba sras bcas kyi/ /mthu stobs drag rtsal yang snying kun gyi bcud/ /gcig bsdus gdod nas rang grol rnal 'byor pa/ /ngag dbang dpal ldan chos skyong zhes grags pa'i/ /skyes mchog dpal bo sngon tshe 'phags yul du/ /rnam 'dren kun blo'i zhal bzhes lung bstan ltar/ /grub thob guhya'i lus blangs bag chags kyis/ /da lta thams cad brdung btsog 'di 'dra byung / /grub chen nag po spyod pa zhes grags pas/ /bla ma'i bka' bcag spyod pa mang du byas/ /de yi las kyis da lta smyon par skyees/ /gzhan yang chos rgyal dri med kun ldan gyi/ /las su blangs pa'i shugs kyis da lta yang / /'dzin chags ser sna mi shes nor rdzas 'thor/ /sngon tshe phru gu ming sring bud med rnams/ /sbyin par btang ba'i dge ba'i 'phen shugs kyis/ /da lta ring myug lci sogs mang du byung / /gnya' khri btsan po lus blangs bag chags kyis/ /da lta 'gyogs byams 'dod pa 'di 'dra byung / /padma 'byung gnas sprul pa yin khul gyis/ /da lta lha 'dre kun gyis brdzi mi nus/ /grags pa rgyal mtshan lus blangs 'phen shugs kyis/ /da lta phyu ba gyon 'dod 'di bzhin byung / /