[A:691]bzhugs par nus so/ /zhes yang yang gsungs kyang / kun dga' bo bdud kyis rna ba khebs nas ci yang ma zhus pa bzhin don du bstan srid kyi sku gegs bdo bas gang yang zhu ma spobs pa'i khar/ rtse phyag ye shes pa la de don rang nyes pa yong gi min nam snyam pa zhus tshod sogs dang / yang dam pa de nyid kyi gsung las/ sngon dus yab rje rdo rje 'chang gzhan don du gshegs skabs/ da khri chen gzhi thog tu byon cing gsungs pa na/ kho bos phyag 'tshal dang 'brel lo gnyis gsum brtan bzhugs kyi yid smon byas pas yab rje mchog nas nga lus na so rgas pas bsdod na ci la phan/ khyed rang yang khri thog tu sdad ring jus lam sogs gang sa nas phun sum tshogs pa byung / khri thog yun ring por ma byed gsungs pa'i lo dus da lo rdzogs kyin yod gsungs pa dang / yang gzhi thog pho brang gi sku sger gyi phyag rdzas rnams kyang / sgrol pho dang zhabs lha sogs su spo ba dang / sngon nas yod pa'i khri thog pa'i thugs mkho rnams de khar bzhag gnang gi zhal bkod mdzad pa la rgyun dang mi 'dra ba'i rtags 'grus che ba mdzad/ yang skabs shig tu gzhi thog nas zhabs lhar byon pa'i tshe/ kun ra nas gnas der spyan cher gzigs te/ da phan skyid po rang byung / da ni ga ler sku bzhugs gnang gsungs pa ni/ mkhan chen ngag dbang chos grags kyi rnam thar dang mtshungs pa dang / yang skabs shig gsungs las mdang nub gnyid dang 'od gsal 'brel ba'i ngang las nub phyogs bde ba can du phyin