[A:711]'dus mchod sprin rgya mtsho bdag med ma'i mngon dkyil nA ro mkha' spyod ma'i sgrub dkyil sogs dang / rdo rje phur pa chos skyong gur zhal rnams kyi gtor gzhung / bskang ba 'gos lugs bstod snying rnams kyi rgyugs sprod sngar bzhin gnang ste so so'i tshogs dbur phebs par mdzad cing / de nas nyid kyi dgung grangs bco lngar phebs pa shing byi gro bzhin zla ba'i nang / nyid kyi yum mchog bsod nams dpal sgron bu khrid sku gshegs par/ yab sras zhal rgyas te gshegs rdzogs rnams rgyas par mdzad cing / khyad par dbu rtser lho byang tshogs yongs nas/ thams cad rigs pa'i rdul tshon gyi dkyil 'khor sgrub mchod sogs mdzad tshul rnams yab rje mangga'i mtshan can gyi rnam thar bzhin dang / 'di tsam zhig la yin nam/ tshe rta zung 'brel gyi bsnyen sgrub mdzad tshod 'dug thugs nyams 'od gsal lta bu'i snang ba 'di kun khang khyim ri sogs 'dus byas bcas kyis ma bsgribs pa stong pa nyid lta bu/ yab rje padma'i mtshan can gyi dges rdor gzhis bsnyen skabs kyi gzigs snang lta bu'i mur grub chen thang stong rgyal po phebs byams 'dra mor phebs pa gzigs snyam dang / yang skabs re mdun gyi nam mkhar grub chen thang rgyal nyid la sangs rgyas byang sems kyis bskor ba'i gzigs snang sogs du ma byung ba yab rje mchog la zhu gnang mdzad par/ da lan bsnyen mtshams gzhan dang mi 'dra ba byung ba sku tshe ring po yong ba 'dug ces gsungs/ 'di lo phur sgrub skabs tshogs dbus su dge 'dun zhal